У Ганцавічах збіраюць лялькі на выставу

Выстава будзе даступная для наведвання з 13 сакавіка па 14 красавіка.

Як патлумачыла дырэктар Дома рамёстваў Маргарыта Саланевіч, мерапрыемства прымеркавана да Міжнароднага дню лялек, і мае мэту захавання і папулярызацыі лепшых традыцый вырабу традыцыйных і сучасных аўтарскіх лялек.

Спрадвек лялькі служылі абрадавым сімвалам, людзі верылі ў іх магічную сілу. І толькі праз пэўны час лялкі ператварыліся ў дзіцячыя цацкі, зробленыя матулінымі рукамі

“Рабіліся лялькі з матэрыялаў, якія былі пад рукой: саломы, драўляных лыжак, вяровачак, цясёмак, кавалкаў ношанага адзення. Таму і атрымліваліся яны не толькі мяккімі і цёплымі навобмацак, але і напоўненымі асаблівай любоўю”, – сказала дырэктар. І дадала: “Мы запрашаем аўтараў народных, аўтарскіх і батлеечных лялек прыняць удзел у нашай выставе”, – сказала Маргарыта Аляксандраўна.

Паўдзельнічаць у мерапрыемстве могуць як дзеці, так і дарослыя. Арганізатары чакаюць вырабы не толькі ад прафесійных і аматарскіх творчых груп, аб’яднанняў і калектываў, а таксама асобныя аўтары.

Падрабязней пра мерапрыемства можна даведацца з Палажэння “Чароўны свет лялек”, якое даступна на сайце http://gnckult.by ці па тэлефоне 2-21-48.