Дзве бронзы “на рэспубліцы” ўзялі ганцаўчанкі

“Гэта цудоўны вынік. Пасля такіх спаборніцтваў тыя рабяты, якія займаюць 1 – 3 месцы, становяцца кандыдатамі ў майстры спорту”, – заўважыў трэнер прызёрак Аляксей Клявец.

Увогуле, у Гомелі праходзіў адбор на еўрапейскія спаборніцтвы, куды адправяцца толькі пераможцы. Удзельнічалі 7 каманд – па адной з кожнай вобласці і з г. Мінска. Таму канкурэнцыя была вельмі жорсткай.

Дзявочую каманду Брэстчыны прадстаўлялі 5 дзяўчат з Ганцавічаў (трэнеры Аляксей Клявец і Вадзім Рылка), 4 – з Пінска і 1 – з Бярозы. І толькі ганцаўчанкі занялі прызавыя месцы. Таму ў немалой ступені дзякуючы ім каманда заняла 5-е месца. Дарэчы, у гэтых рэспубліканскіх спаборніцтвах удзельнічалі юнакі і дзяўчаты 1997 – 1998 гадоў нараджэння. А Даша Буйкевіч нарадзілася ў 2000 годзе, і ёй прыйшлося змагацца са старэйшымі за яе саперніцамі.

Аляксей Уладзіміравіч расказаў, што Даша вучыцца ў Любашаўскай базавай школе, трэніруецца ў спартыўнай дзіцяча-юнацкай школе алімпійскага рэзерву два гады. Даша ўжо трохкратная прызёрка рэспубліканскіх спаборніцтваў. Крысціна Каржанеўская вучыцца ў СШ № 1 г. Ганцавічы, яна ўпершыню трапіла на спаборніцтвы такога ўзроўню.

Па словах трэнера прызёрак, на Брэстчыне няма вучылішча алімпійскага рэзерву, дзе б вучылі вольнай барацьбе. У той жа час, у Гродне і Гомелі вельмі моцныя школы вольнай барацьбы. “Нам цяжка ў гэтым плане: сваіх выхаванцаў мы адпраўляем вучыцца ў іншыя вобласці”, – сказаў Аляксей Уладзіміравіч. На гэтым фоне дасягненні Дашы і Крысціны здаюцца яшчэ больш важкімі. Так трымаць, дзяўчаты!