Чаму ганцаўчане купляюць свініну ў Баранавічах?

Падставай для гэтага сталі публікацыі ў СМІ, якія спасылаюцца на расказы жыхароў Баранавіцкага раёна пра тое, што на свінакомплексе распаўсюджваецца нейкая страшная хвароба і на працягу некалькіх дзён было забіта і закапана прыкладна 20 тысяч галоў жывёлы, якую забівалі і кідалі ў катлаваны, перасыпаючы хлоркай.

Мясцовыя ўлады і кіраўніцтва прадпрыемства, як паведамляюць СМІ, катэгарычна абвяргаюць усялякую інфармацыю пра надзвычайнае здарэнне.

У дэпартаменце ветэрынарнага і харчовага нагляду Міністэрства сельскай гаспадаркі і харчавання запэўніваюць, што ўсё ў парадку.

Але калі ўсё спакойна і падзеж свіней у рамках нормы, то ўзнікае пытанне: чаму тэрыторыя паблізу свінакомплекса ачэплена міліцыяй?

Да таго, як інфармацыя з’явілася ў інтэрнэце, я пазваніў галоўнаму ветэрынарнаму ўрачу Баранавіцкага раёна Мікалаю Пакумейку, які некалі жыў у вёсцы В. Круговічы. Інфармацыю пра тое, што на свінакомплексе тысячамі знішчаюць свіней, ён абвергнуў.

Між тым чуткі пра страшную хваробу распаўсюдзіліся не толькі ў Беларусі. 7 мая Украіна ўвяла забарону на ўвоз свіней і свініны з Беларусі “ў сувязі з публікацыямі ў прэсе пра знішчэнне пагалоўя свіней у Баранавіцкім раёне і падазрэннямі ў распаўсюджванні афрыканскай чумы свіней”.

Афрыканская чума свіней чалавеку не перадаецца. Разам з тым, для свіней яна смяротная, вакцыны ад гэтага захворвання няма. Распаўсюджванне віруса можна прадухіліць толькі шляхам поўнага знішчэнння.

Расійскія эксперты паставілі свінням свінакомплекса «Ўсходні» ў Баранавіцкім раёне Брэсцкай вобласці дыягназ – рэпрадуктыўна-рэспіраторны сіндром.

Як бы там ні было, але, ведаючы, што жывёліна можа быць хворая, есці такое мяса не кожнаму захочацца.