ТОП-10 самых прадаваемых кніг

Канешне, зараз няма такога, каб у кнігарнях стаялі чэргі, а ў 90-х гадах было такое, што нават у вясковых кнігарнях пакупнікі займалі чаргу за некалькі гадзін да іх адкрыцця. Але і цяпер людзі купля­юць кнігі, якія зноў становяцца прадметамі не толькі моды, але прыкметай элітнасці і адукаванасці чалавека.

Так лічаць не толькі аматары кнігі, але і прадаўцы, якія адзначаюць рост попыту на кніжную прадукцыю.
Мы з калегамі з Брэста і Маладзечна параўналі, якія кнігі купляюць у розных гарадах, паразмаўлялі з прадаўцамі інтэ­лектуальных скарбаў і склалі рэйтынг самых запатрабаваных пакупнікамі выданняў.

Загадчык маладзечанскай кнігарні «Спадчына» Сяргей Субаткоўскі, які можа на паліцах магазіна знайсці любую кнігу, кажа: «Нашы чытачы – інтэлігентныя і інтэ­лектуальныя людзі. Што вы! Пытаюцца пра такія кнігі, што дзіву даешся. А мы, у сваю чаргу, імкнёмся дагадзіць пакупніку, па яго запыту можам дастаць амаль любую кнігу». Па яго словах, калі якой-небудзь кнігі ў продажы няма, у магазіне аформяць заяўку і дашлюць яе ў Мінск, у «Белкнігу». Адтуль ужо неабходны экзэмпляр абавязкова дойдзе да свайго чытача.

Пакупнікам «Белкнігі» прапануюцца розныя акцыі, напрыклад, другую кнігу такога ж выдання чытач можа забраць з кнігарні абсалютна бясплатна. А яшчэ многія выданні можна купіць са значнай зніжкай.

У Ганцавічах попыт на кнігі таксама разнастайны: акрамя класікі, як беларускай і рускай, дзе ў ТОПе творы Уладзіміра Караткевіча, Святланы Алексіевіч, Міхаіла Булгакава, Льва Талстога і Мікалая Гогаля, на перадавых пазіцыях вучэбная літаратура, даведнікі для паступлення. Потым ідзе дзіцячая літаратура, тым больш, што яна зараз такая яркая і стымулюе гарманічнае развіццё детак. Карыстаюцца попытам кнігі, у якіх расказваецца пра нашых землякоў. Ды і як падарунак кніга не страціла сваёй каштоўнасці.