Абслугоўванне ў хатніх умовах і топ-5 аўтараў. Бібліятэчныя змены ў Ганцавічах у абстаноўцы «кавіду»

Бібліятэкар кнігасховішча Святлана Курылік абслугоўвае чытачоў і займаецца захаваннем кніжнага фонду / Фото: Аляксандр Пазняк

—У нас заўсёды нядрэнная наведвальнасць. Людзі ідуць, як да абеду, так і пасля. Прыкладна 35 чалавек бывае толькі ў даабедзенны час. Ганцаўчане прыходзяць як за кнігамі, перыёдыкай, так і зрабіць розныя кампутарныя паслугі: ксеракс, раздрукоўку, набор тэкста. Але наведвальнасць цяпер усё ж такі меньшая, бо сітуацыя ва ўсім свеце самі ведаеце якая, — распавяла дырэктар.

Акрамя таго супрацоўнікі раённай бібліятэкі даўно не праводзілі масавыя мерапрыемствы, але затое больш актыўнасці набыў бібліятэчны сайт.

—Узмацнілася віртуальнае наведванне бібліятэкі. Калі раней было каля 30 наведванняў у дзень , цяпер яно даходзіць да 150, — кажа Ала Хваль.

Кнігі, якія чытачы прыносяць пасля прачытвання з дому, трапляюць на пяцідзённы каранцін. Іх памяшчаюць у бібліятэчным кнігасховішчы папярэдне працёршы вокладку растворам з дадаткам хлору.  І толькі пасля пяцідзённай лёжкі, яны зноў трапляюць на паліцы.

Бібліятэкар кнігасховішча Святлана Курылік распавяла пра тое, што апошнім часам нашых жыхароў, у шэрагу іншай літаратуры, пачала цікавіць класіка. Нават пытаюць вельмі рэдкія творы, якія самі бібліятэкары павінны яшчэ добра пашукаць сярод вядомага.

—Чытачы цікавяцца сучаснай літаратурай. Бяруць дэтэктывы, жаночыя, любоўныя раманы. Акрамя таго людзі пачалі цікавіцца класікай. Не так даўно прыйшла адна жанчына, якая спытала твор Чэхава “Драма на паляванні”. Прыйшлося пашукаць гэты твор, бо ён не на слуху, — пракаментавала Святлана Курылік.

Аматары кніг могуць замовіць літаратуру або перыядычныя выданні з дастаўкай на дом. Такой паслугай часцей за ўсё карыстаюцца інваліды, пенсіянеры, якія просяць, каб іх наведалі з кнігай. Некаторым сталым чытачам супрацоўнікі тэлефануюць самі і прапаноўваюць чытанне.

—Хадзіла да двух жанчын на вуліцу Грыцаўца, адной з якіх за 80 год, а другая інвалід. Яны так былі ўсцешаныя тым, што да іх прыйшлі з бібліятэкі і прынеслі часопісы. У той жа час яны займаюцца кветкамі ў сваім садзе, але выходзіць далёка за межы жытла абедзвюм складана. Нават унук адной з жанчын не хаваў радасці, што ў такі складаны час ягоная бабуля камусьці патрэбна, — кажа бібліятэкар.

Таксама пэўную папулярнасць набылі ў бібліятэцы аўдыёкнігі, у якіх агучаны вядомы твор. Асаблівым попытам з аўдыё карыстаюцца “Каласы пад сярпом тваім” Уладзіміра Караткевіча, творы Рэмарка. Дыскі з аўдыёкнігамі часцей за ўсё бяруць людзі ў якіх праблемы са зрокам і моладзь.

У бібліятэцы сказалі, што адзін хлопец, які знаходзіцца ў Ганцавічах на адпрацоўцы, часта бярэ аўдыёкнігі, каб слухаць іх па дарозе да хаты бацькоў, калі едзе на аўтамабілі. Аўдыёкніга маладому спецыялісту даспадобы больш чым музыка, бо дапамагае засяродзіцца на дарозе і пагрузіцца ў іншы свет.

Топ-5 цэнтральнай раённай бібліятэкі:

Гузель Яхіна “Зулейха адчыняе вочы”

Віталь Кулік “Вядзьмарка палеская”

Творы Васіля Быкава

Творы Наталлі Батраковай

Творы Паўла Каэлья