Настаўнікамі года ў раёне сталі адразу 6 педагогаў

Пераможцы раённага тура рэспубліканскага конкурсу “Настаўнік года”. Фота з сайта gancevichi.edu.by

“Сёлета ўпершыню ў рэспубліканскае палажэнне ўвялі 6 прадметных намінацый, па якіх і спаборнічалі педагогі”, – расказала начальнік аддзела адукацыі, спорту і турызму Надзея Уладзіміраўна Здрок. Менавіта таму і на раённым этапе былі выбраны лепшыя педагогі па кожнай з намінацый.

З шасці пераможцаў адразу два настаўнікі абаранялі гонар Востраўскага дзіцячага сада – сярэдняй школы імя Міхася Рудкоўскага. У намінацыі “Руская мова і літаратура, беларуская мова і літаратура” лепшай была названа настаўнік беларускай мовы і літаратуры Валянціна Мікалаеўна Хваль. У намінацыі “Музыка, выяўленчае мастацтва, працоўнае навучанне, чарчэнне, фізічная культура і здароўе, дапрызыўная падрыхтоўка” перамог Міхаіл Іванавіч Вадап’ян.

Таксама пераможцамі ў сваіх намінацыях сталі: настаўнік фізікі Хатыніцкай СШ Дзмітрый Станіслававіч Бондар (намінацыя “Фізіка, астраномія, інфарматыка, матэматыка”); настаўнік пачатковых класаў СШ № 1 г. Ганцавічы Ларыса Сяргееўна Ільюкевіч (“Пачатковыя класы”); настаўнік англійскай мовы гімназіі г. Ганцавічы Алена Яўгенаўна Дайлід (“Замежная мова”); настаўнік гісторыі СШ № 3 г. Ганцавічы Наталля Міхайлаўна Паплаўская (намінацыя “Гісторыя, грамадазнаўства, геаграфія, хімія, біялогія”).

Па словах Надзеі Уладзіміраўны, пераможцам раённага конкурсу цяпер належыць прайсці абласны адборачны этап праз два туры: завочны і вочны. У час завочнага тура настаўнікі прадставяць свае відэаўрокі і партфоліа, у якім будзе сабрана і сістэматызавана інфармацыя аб уласным вопыце работы.