Настаўніцкі “Агеньчык” сабраў ветэранаў

Задаволеныя сустрэчай з калегамі, настаўнікі-ветэраны дзяліліся жыццёвымі ўражаннямі, расказвалі пра сваё жыццё на заслужаным адпачынку / Фото: Мария Орса

На «Агеньчык» завітаў і старшыня райвыканкама Аляксандр Саланевіч. Прыветна і гасцінна сустракалі настаўнікаў вучні СШ №3, запрашаючы ў актавую залу на ўрачыстую прывітальную частку мерапрыемства. Старшыня райвыканкама першы вітаў ветэранаў працы шчырымі цёплымі словамі.

“Палескую глыбінку нашу матухна-прырода абдзяліла ўраджайнымі землямі, але затое адукацыйны працэс тут знаходзіцца на належнай вышыні. Вы, шаноўныя настаўнікі, зрабілі вялікі ўклад у развіццё рэгіёна і праслаўлялі раён у рэспубліцы. А таму загадваю вам жыць доўга”, – гаварыў Аляксандр Паўлавіч.

Старшыня аддзела адукацыі, спорту і турызму райвыканкама Надзежда Уладзіміраўна Здрок падзякавала настаўнікам за шматгадовую працу і адданасць прафесіі, пажадала толькі пазітыўных пачуццяў і падзей у гэты дзень.

І сапраўды, пазітыўны настрой і найлепшыя пачуцці выклікалі ў сэрцах педагогаў праз песні і танцы юныя артысты з РЦДЮТ і іх настаўнікі. А Ганна Ярашэвіч з Раздзялавіч сваёй гумарыстычнай байкай прыўзняла настрой нават у самых заспакоеных калегаў. Спяваў Іван Бондар, віншавалі ветэранаў Яўгенія Стацько і маладыя спецыялісты Ганна Арэшка і Аляксандр Заяц.

А потым настаўнікаў запрасілі да святочнага стала на шклянку чаю з прысмакамі. І гаманілі між сабою тыя, хто не бачыўся гадамі, расказвалі аб сваім жыцці на пенсіі, дзяліліся жыццёвымі ўражаннямі. Як сказала былы метадыст аддзела адукацыі, а цяпер ветэран працы Лідзія Блашкевіч, тут усе сабраліся, каб парадавацца поспехам у адукацыі, падзяліцца пэўнымі праблемамі, паспачуваць у пэўных справах.

Залатыя словы сказала былы завуч СШ №1 Ніна Самусейка: “Мы вечныя настаўнікі. І мы заўсёды будзем патрэбныя. Наша слова не заменіць ніякі камп’ютар”.

У размове з былым завучам гарадской гімназіі Валянцінай Анішчанка былі закрануты адукацыйныя праблемы і тое, якімі цяпер яны бачацца ёй: “Па-першае, статус настаўніка павінен узняцца, тым больш што зарплату павысілі. Па-другое, узровень адукацыі расце, а выхавання – падае. І таму трэба сур’ёзна думаць над выхаваннем патрыятызму і грамадзянскасці”, – сказала Валянціна Іванаўна.

Разыходзіліся з мерапрыемства ветэраны з прыўзнятым настроем, задаволеныя сустрэчай з калегамі і шчаслівыя надзеяй, што падобныя сустрэчы чакаюць наперадзе.