«Усе запасліся антыбактэрыяльнымі сродкамі, антысэптыкамі, маскамі”. Расповед пра рэжым у Маскве

Машыны стаяць у дварах. На карантыне ўся Масква / Фото: Аляксей Лукашэвіч

Раней мы ўжо размяшчалі расповед Алёны В. пра працу маскоўскіх супермаркетаў. А зараз вырашылі даведацца, што у Маскве змянілася ў сувязі з ўвядзеннем каранціну.

—Аляксей, распавядзі, што ў Маскве змянілася з пачаткам каранавірусу?

—З пачаткам каранавіруса было дзве невялікіх хвалі панікі. Першая, калі папаўзлі чуткі аб магчымым каранціне. Другая,  калі аб’явілі, што будуць непрацоўныя дні. Тады ў крамах скупалі макароны і грэчку. Увечары можна было не знайсці тавара на паліцах, але зранку паліцы зноў былі запоўненыя.

З пачаткам абавязковай самаізаляцыі Масква апусцела. Машын зменела дзесці на 60-70%. Бальшыня людзей апранаюць маскі. Уваходы ў метро патрулюе паліцыя. Але ніякіх дзеянняў яна не прадпрымае.

Пакуль мы ў рэжыме абавязковай самаізаляцыі. З сярэдзіны тыдня ўвялі штрафы за яго парушэнні. У СМІ кажуць аб прадленні гэтага становішча.

Большасць працадаўцаў, якія маглі, перавялі сваіх работнікоў на рэжым працы з дому. А вось кафэ, салоны прыгажосці,  крамы з вопраткай, электронікай зачыненыя.

Бачыў, што людзей, якім відавочна за 65, не пускалі ў метро і грамадскі транспарт, а пенсіянеры з гэтага абураліся.

—Што думаюць самі людзі пра гэтыя меры?

—Калі напачатку ўсё успрымалася так, як быццам гэта нас не кране, то зараз абсалютная бальшыня знаёмых і калег успрымаюць меру самаізаляцыі як правільную. Усе запасліся антыбактэрыяльнымі сродкамі: сурвэткамі, антысэптыкамі, маскамі.

Ў нашым доме, напрыклад, кожную раніцу санітарная апрацоўка. Да таго ж, мы з суседзямі  дамовіліся і па чарзе апрацоўваем свой паверх. Мыем падлогу, дзверы, ручкі  спецсродкамі і хлоркай.