Жывёлаводы СВК “Крышылавічы” скардзяцца на нізкую зарплату

Фото: Даглядчык Уладзімір Заяц даглядае больш за 100 цялушак і атрымлівае зарплату каля паўтара мільёна рублёў. Фота: Пётр Гузаевский

“Зарплаты новы старшыня абяцаў павысіць, але нешта не відно таго павышэння. Мы ўжо хацелі не выходзіць на працу ў знак пратэсту, але шкада жывёлы, бо яна ж не вінатавая, яе карміць і даіць трэба, – скардзілася даярка са шматгадовым стажам Марыя Сташанін. – Старшыня загадаў нікуды не скардзіцца, бо ўсё роўна мы нічога не даб’ёмся. Я 13 старшынь перажыла, і працую, і не баюся звальнення”.

Па словах Марыі Радзівонаўны, за мінулы месяц яе зарплата склала чыстымі 2 млн 400 тысяч рублёў. І гэта пры тым, што надаіла малака больш за ўсіх: 10 тон – вышэйшага і 5600 кг – 1-га гатунку. Па яе словах, за вышэйшы гатунак даярцы налічваюць 140 тыс. рублёў за тону, а за 1-ы – 90 тысяч.

“Надоі не толькі ад нас залежаць, пасьбішчы трэба нармальныя. Вось як мукі дадуць больш – надоі адразу растуць, але ж не даюць столькі, колькі патрэбна па рацыёне”, – расказвае даярка.

Скардзіліся жывёлаводы і на тое, што няма на комплексе расцэнак аплаты працы і ў разліковых лістках не ўказана, за што налічана зарплата.

Некаторыя работнікі лічаць, што новы старшыня СВК “Крышылавічы”, які прыступіў да працы каля трох месяцаў таму, узяўся за справу “закрута”.

“Мы не супраць таго, што навесці парадак трэба, і тут я яго падтрымліваю. А то колькі ні працуй, а зарплата як была жабрацкая, так і застаецца, – сказаў даглядчык Уладзімір Заяц. – Я ж не патрабую нейкай завоблачнай зарплаты, але за мінімалку без выхадных дзён ці варта працаваць? Чым карміць дзяцей? За мільён трыста тысяч?”

“Начальства кажа, што прывага малая. А адкуль жа ёй узяцца, калі цялушкі ў жыжы стаяць? Гной высунулі, а падаслаць няма чым. Кармы абы-якія”, – скардзіўся даглядчык.

Скардзіліся жывёлаводы і на тое, што рэдкім госцем на круговіцкіх ферма з’яўляецца галоўны заатэхнік Антаніна Аляксейчык, бо акрамя ветэрынара Аляксандра Шэстака і старшыні СВК, ніхто не паказваецца з Вострава, дзе знаходзіцца цэнтральная сядзіба праўлення сельгаскааператыва.

Як патлумачыў намеснік начальніка ўпраўлення райсельгасхарчу Ганцавіцкага райвыканкама Іван Янюк, расцэнкі на аплату за надоі малака і догляд жывёлы кожная гаспадарка ўстанаўлівае самастойна. Напрыклад, у Мінскай вобласці ў перадавых гаспадарках расцэнкі значна ніжэйшыя, чым у нашых сельгаскааператывах, але зарплата вышэйшая, бо надойваюць яны значна больш. За гатункі «Экстра» і «Вышэйшы» расцэнкі вагаюцца ад 70 да 150 тысяч рублёў за тону надоенага малака. А за 1-шы гатунак – увогуле 50-60 тысяч рублёў за тону.

“Нават калі параўноўваць надоі на фермах участка ў Дзяніскавічах на ААТ “Ганцавіцкага райаграсэрвіса”, то амаль пры аднолькавых расцэнках зарплаты ў даярак там большыя, бо зараз у сярэднім надой ад каровы ў іх 17,35 літраў у дзень, а ў СВК “Крышылавічы” – 11,33 літра”, – патлумачыў Іван Канстанцінавіч.

Старшыня СВК “Крышылавічы” Сяргей Хадатчук згадзіўся, што некаторыя праблемы ёсць, але вырашыць іх – гэта справа не аднаго дня і нават месяца. “Я сустракаюся кожны дзень з людзьмі і тлумачу, што нельга за месяц ці два дабіцца адразу бачнага выніку. Пасля таго як я заступіў на пасаду старшыні, першым, каму я загадаў павысіць расцэнкі, былі жывёлаводы. Мы зараз працуем над паляпшэннем кармавой базы. Хачу, каб людзі мяне разумелі і дапамагалі”, – сказаў Сяргей Іванавіч. – Ад малака ў нас ільвіная доля даходаў, і калі будзем усе старацца, то будуць і большыя зарплаты, і лепшыя ўмовы працы”.