На вуліцы Янкі Купалы ў Ганцавічах забаранілі праезд грузавікоў

Кожны год жыхары скардзіліся, што на дарозе каляіны да калена і грузнуць нават лесавозы. Неаднаразова пра гэта пісала і газета “ГЧ”. У сакавіку мы нават жартавалі, што вуліца Янкі Купалы можа стаць месцам для экстрым-турызму і прыцягнуць гасцей з Беларусі і краін-суседзяў.

У наш раён неаднаразова прыязджалі палякі на джыпах і шукалі дарогі ў лесе і на балоце, каб пабуксаваць.

Яшчэ ў пачатку лістапада па гэтай вуліцы не кожны на легкавым аўтамабілі мог праскочыць. Па словах жыхароў, нават “Ніва” з двума вядучымі мастамі спрабавала праехаць, але, пабуксаваўшы, ледзьве выехала заднім ходам і паехала ў аб`езд.

Мясцовыя жыхары скардзіліся на лесавозы Ганцавіцкага леспрамгаса: маўляў, калі яны разбіваюць дарогі, то леспрамгас павінен уносіць і грошы на яе рамонт.

Але ж вядома, што як кожны аўтаўладальнік, так і прадпрыемствы плацяць немалыя грошы за так званы дорожны збор. Таму і доля леспрамгаса ў фінансаванні ўжо ёсць. А вось куды ідуць тыя грошы – гэта пытанне моцна хвалюе грамадзян.

Праўда, у пачатку красавіка 2017 года А. Лукашэнка даручыў разабрацца з гэтым пытаннем і абавязаў за тры-чатыры гады прывесці ў парадак усе мясцовыя дарогі. Чакаем і будзем сачыць…