Лёс сквера на Паркавай хвалюе не многіх

Ва ўсіх васьмі чалавек, што прыйшлі на сход, перапісалі пашпартныя дадзеныя

З народам мясцовыя ўлады, а на сходзе прысутнічалі спецыялісты аддзела гарадской камунальнай гаспадаркі і інспекцыі аховы прыроды і навакольнага асяроддзя, вырашылі параіцца і выслухаць меркаванні наконт таго, ці варта зрэзаць 23 дрэвы ў скверы, у якім па суботах гандлююць прыезджыя камерсанты. 

Ва ўсіх васьмі чалавек перапісалі пашпартныя дадзеныя і месца жыхарства, пасля чаго паказалі сабраўшымся кожнае дрэўца, якое ўжо загадзя было адмечана крыжыкам.

Па праўдзе, у Ганцавічах маглі гэтае добраўпарадкаванне зрабіць і без “дазволу” людзей, тым больш што спецыялісты Ганцавіцкага лясгаса правялі абследаванне і адзначылі, якія дрэвы падлягаюць высечцы.

Усе пагадзіліся, што некалькі высахшых соснаў і тонкіх бярозак у скверы трэба зрэзаць, бо сухія дрэвы псуюць эстэтычны выгляд, а бярозы не хочуць расці пад ценем высокіх соснаў.

Людзі выказваліся, што добраўпарадкаванне патрэбна, але не для таго, каб там пашыраць пляцоўкі для гандлёвых месцаў.

“Мне і многім, думаю, важна, каб не знішчаць сквер, бо не мы яго закладалі, а паставіць там лаўкі, каб можна было пасязець у цяньку; асвятленне зрабіць, і будзе добрае месца адпачынку для тых, хто жыве паблізу, – сказаў ганцаўчанін Мікалай Манолій. – Сквер павінен застацца скверам, інакш, калі туды ўвесь час будуць заязджаць машыны, то ў хуткім часе высахнуць і астатнія дрэвы. Кірмаш лепш перанесці ў іншае месца».

Дарэчы, ужо неаднаразова жыхары горада звярталі ўвагу на тое, чаму работнікі ДАІ, якія папярэджваюць і штрафуюць аўтаўладальнікаў, што на газонах у дварах ставяць транспартныя сродкі, не заўважаюць, як на тэрыторыю сквера – зялёную зону – заязджаюць аўтамабілі, знішчаецца травяное покрыва… Камерсантаў ніхто не чапае.

Па словах спецыяліста аддзела жыллёва-гарадской гаспадаркі Вячаслава Кандратовіча, канчаткова рашэнне аб выразанні дрэў прымуць пасля таго, як будзе пісьмовае заключэнне работнікаў лясгаса і рашэнне органаў улады.