Перастаноўкі і абнаўленні ў калектывах

ДУ “Раённы цэнтр гігіены і эпідэміялогіі”

Галоўным санітарным урачом раёна 22 снежня быў назначаны Дзмітрый Аляксандравіч Гарэгляд, які да гэтага працаваў урачом-эпідэміёлагам у санэпідэмстанцыі Камянецкага раёна. Былы галоўны санурач раёна Аляксандр Данілавіч Салянік не адправіўся на заслужаны адпачынак, а застаўся ў калектыве і працуе ўрачом-гігіеністам.

Даведка «ГЧ»
Знаёмцеся: Дзмітрый Аляксандравіч Гарэгляд. Нарадзіўся ў 1988 годзе ў в. Лунін Лунінецкага раёна. У 2011 годзе закончыў медыка-прафілактычны факультэт Беларускага дзяржаўнага медыцынскага ўніверсітэта. За плячыма ўрача – год інтэрнатуры ў ДУ “Брэсцкі занальны цэнтр гігіены і эпідэміялогіі”. Пасля працаваў у санэпідэмстанцыі Камянецкага раёна.
Жанаты. Жонка – урач-бактэрыёлаг.

Установа аховы здароўя “Ганцавіцкае РТМА”

Тут 3 снежня адбылася своеасаблівая ракіроўка: да выканання абавязкаў намесніка галоўнага ўрача па медыцынскай часці прыступіла Ларыса Канстанцінаўна Капусціна, якая да гэтага займала пасаду галоўнага раённага педыятра. А былы намеснік галоўурача Аляксандр Уладзіміравіч Лагодзіч цяпер працуе галоўным раённым педыятрам.

Раённае спажывецкае таварыства

Выконваць абавязкі намесніка гэтай арганізацыі з 24 снежня пачала Алена Іванаўна Шулякоўская. Былы намеснік Зоя Валянцінаўна Дударга засталася працаваць у арганізацыі на пасадзе начальніка ўчастка (прадуктовая зона).

Адбылася і яшчэ адна перамена ў райспажыўтаварыстве: былы начальнік аддзела кадраў Андрэй Андрэевіч Далянчук пакінуў займаемую пасаду. Цяпер складаным кадравым пытаннем будзе займацца Юрый Генадзьевіч Карповіч, які назначаны начальнікам аддзела кадраў, арганізацыйна-кааператыўнай і ідэалагічнай работы.