Міліцыя павышае рэйтынг даверу ў насельніцтва

Свята ўдалося на славу. На гулянне сабралося вельмі шмат народу. Мерапрыемства было так удала арганізавана, што кожны чалавек, незалежна ад узросту, мог знайсці сабе занятак па інтарэсах. Водгукі аб мерапрыемстве былі самымі найлепшымі, незадаволеных не знайшлося. “Нават 1 мая не сабралася столькі людзей”, – адзначыла Наталля Мелехавец.

Аднымі з самых чаканых падзей мерапрыемства для гасцей свята сталі паказальныя выступленні супрацоўнікаў АМАП палка ППСМ УУС Брэсцкага аблвыканкама па вызваленні захопленых заложнікаў з выкарыстаннем зброі і дымавых сродкаў. У чаканні відовішча людзі ад малога да вялікага выстраіліся ўздоўж вуліцы Гагарына. І тут пачаліся стрэлы, выбухі – дзеці ў плач, мамы з імі кінуліся ў сквер. Усё прайшло імгненна. Некаторыя прысутныя адчулі расчараванне, але толькі таму, што супрацоўнікам АМАП спатрэбілася ўсяго каля адной хвіліны, как вызваліць заложнікаў з машыны. Вялікую ўвагу людзей прыцягнулі пляцоўкі са зброяй і абмундзіраваннем. На ўсё гэта можна было не толькі паглядзець, а патрымаць у руках аўтамат Калашнікава, паспрабаваць зарадзіць яго патронамі і сфатаграфавацца. Не менш папулярнымі былі і конкурс на перацягванне каната і бітва на бервяне. А колькі шчасця і гонару было ў тых пераможцаў, якіх на галоўнай сцэне ўзнагародзіў сам начальнік Ганцавіцкага РАУС, падпалкоўнік міліцыі Аляксей Яроменка!

Добра паказалі сябе супрацоўнікі міліцыі і ў творчых выступленнях. Мужчынская вакальная група Ганцавіцкага РАУС некалькі разоў падымалася на сцэну і дэманстравала свае выдатныя вакальныя дадзеныя. Разам з нашымі ахоўнікамі парадку на сцэне выступалі і навучэнцы Брэсцкага абласнога кадэцкага вучылішча і артысты мясцовай самадзейнасці. Пацешыў слухачоў і запрошаны аркестр МУС з Гродна.

Але супрацоўнікі міліцыі не толькі забаўлялі ганцаўчан і гасцей горада. У людзей была магчымасць задаць любыя пытанні супрацоўнікам аддзела па грамадзянстве і міграцыі, супрацоўнікам ДАІ, аддзялення аховы правапарадку і прафілактыкі, а таксама пазнаёміцца з працай участковых інспектараў міліцыі. На адным з кансультацыйных пунктаў праводзілася агітацыйна-тлумачальная праца па пытаннях паступлення ва ўстановы адукацыі сістэмы МУС Рэспублікі Беларусь.

Па інфармацыі, якая стала вядомай з неафіцыйных крыніц, арганізаваць мерапрыемства ганцавіцкія міліцыянеры вырашылі, каб павысіць рэйтынг даверу ў насельніцтва, бо адна з апошніх праверак і апытанняў жыхароў Ганцаўшчыны паказала, што гэты паказчык зменшыўся.

Па словах начальніка міліцыі Аляксея Генадзьевіча, ініцыятарам гэтага мерапрыемства стаў Ганцавіцкі РАУС. Была пастаўлена задача пазнаёміць грамадзян з супрацоўнікамі РАУС, паказаць і расказаць, чым яны займаюцца. Ён сказаў таксама, што ў тым, каб у нашым горадзе прайшло такое мерапрыемства, ёсць заслуга аддзела культуры райвыканкама і ЮІДаўцаў.

На свяце працавалі прафілактычныя пляцоўкі “За здаровы лад жыцця!”, “Скажы наркотыкам “НЕ”, “За чысціню горада”, выставы «Гісторыя Ганцавіцкага РАУС», дзіцячых малюнкаў і вырабаў на тэму «Міліцыя вачамі дзяцей», узбраення Ганцавіцкага РАУС і атрада міліцыі асобага прызначэння.

Па словах ганцаўчан і гасцей, міліцыянеры арганізавалі сапраўднае свята, якое надоўга запомніцца.