Чым больш канкурэнтаў у гандлі, тым ніжэйшыя цэны

На радасць ганцаўчанам і жыхарам вёсак, якія рынуліся ў горад за пакупкамі, канкурэнцыя паспрыяла таму, што ў магазінах пачалі сустракаць прыветліва, а цэны на некаторыя прадукты прыемна патаннелі.

Танней, чым было раней, можна купіць мандарыны, яблыкі, розныя кансервы, макароны, крупы і іншыя тавары. Самымі інфармаванымі аказаліся пенсіянеркі, з якімі пагутарыў журналіст “ГЧ”.

Пажылыя жанчыны – гэта хадзячыя энцыклапедыі, якія ведаюць да дробязяў цэны амаль ва ўсіх гандлёвых кропках. Таму не здзівіла, што пенсіянеркі няблага эканомяць, маючы багаж інфармацыі. У наступных нумарах “ГЧ” мы пачынаем друкаваць цыкл артыкулаў пра тое, дзе і што можна купіць больш выгадна. А вас, паважаныя чытачы, запрашаем дапамагчы нам і таксама дзяліцца такой інфармацыяй.

Ведаючы кошт прадуктаў у розных магазінах, на сэканомленыя грошы можна дазволіць сабе купіць да навагодняга стала дадатковыя прысмакі.