Дарагія браты і сёстры ў Хрысце!

Анджэй Шода / Фото: Андрей Литвинович

Хрыстос прыйшоў на свет, каб навучыць нас змагацца з нашымі слабасцямі: перамагаць зло дабром, нянавісць – любоўю, хлусню – праўдай, абыякавасць – клопатам і спачуваннем.

Божае нараджэнне – гэта асаблівы час шукання Бога, які стаў адным з нас. Гэта час нашага спаткання з Ім у святыні, каля яселек, праз святыя сакраманты, у штодзённай малітве, падчас калядных спеваў, у кожнай сям’і і ў парафіяльнай супольнасці. Праўда аб нараджэнні Сына Божага ў абліччы чалавека павінна аб’ядноўваць нас у веры і змаганнях дзеля яе чысціні, захавання хрысціянскіх каранёў і пабудовы жыцця на духоўных каштоўнасцях.

Бог таксама прагне выкарыстаць кожнага з нас, каб мы паверылі, што прыйшоў чаканы Збаўца, каб тыя, хто згубіўся на сцежках свайго жыцця, адшукаў дарогу да святыні, далучыўся да супольнасці вернікаў і прыняў Бога ў сваё сэрца.

Дзелячыся аплаткам у сям’і, давайце выкажам узаемныя пажаданні, забудзем пра тое, што нас падзяляе і з гэтага моманту пастараймася быць больш добрымі і зычлівымі у адносінах адзін да аднаго.

Віншую са святам хрысціян іншых канфесій, а таксама ўсіх людзей добрай волі.

Божага благаславення і здароўя вам, умілаваныя ў Хрысце браты і сёстры! Жадаю вам шчырай радасці, моцнай веры, нязломнай надзеі і братняй любові. Няхай зорка Хрыстова не перастае свяціць у сэрцах, указваючы шлях праўды, любві і душэўнага спакою.