Першы трафей – чэрап ваўчыцы

Сяргей Бруй з сынамі Дзімам і Валодзем каля трафейнай ваўчыцы.

Як расказаў “ГЧ” Сяргей, было ўжо пад раніцу, калі метраў за дзвесце ён убачыў ваўка. Шэры драпежнік бег насустрач паляўнічаму і не бачыў яго.

«Я ўзняў стрэльбу і пайшоў насустрач ваўку, калі нас раздзяляла ўсяго метраў семдзесят, – расказвае паляўнічы. – Я стрэліў першы раз, але куля праляцела міма, тады я адразу ж стрэліў другі раз карцеччу і трапіў шэраму пад вока. Стрэл зваліў звера напавал».

Калі паляўнічыя падышлі бліжэй і пачалі абглядаць здабычу, то ўбачылі, што гэта ваўчыца. Пры ўскрыцці высветлілася, што яна была цяжарнай: ва ўтробе было чатыры ваўчаняці.

“Я вельмі рады такой удачы, бо гэта мой першы воўк і ўвогуле першая вялікая здабыча! – расказаў Сяргей. З чэрапа ваўка пасля ацэнкі я зраблю памятны трафей для сябе: будзе што паказаць сябрам і знаёмым. Шкада, што шкура ўжо няякасная: поўсць выліняла. Каб яшчэ з месяц назад, дык трафей быў бы больш багатым”.

Па словах паляўнічага, ваўкі лічацца шкоднымі жывёлінамі, і іх дазваляюць адстрэльваць без абмежаванняў. “Калі б гэтыя ваўчаняты нарадзіліся і выраслі, то маглі б нанесці вялікую шкоду”, – сказаў Сяргей Бруй.

Пагутарыўшы з паляўнічымі, я даведаўся, што, акрамя трафея ў выглядзе чэрапа, які можна адмыслова апрацаваць і адбяліць, каштоўным з’яўляецца і сэрца ваўка. У інтэрнэце ёсць аб’явы жадаючых купіць воўчае сэрца. За гэты орган людзі гатовы заплаціць 100 долараў. Некаторыя лічаць, што з яго робяць лекі, якія дапамагаюць ад “падучай хваробы”, ці эпілепсіі. Таму на шэрым санітары лесу можна яшчэ і няблага зарабіць.

Але якім бы шкодным ні лічылі шэрага ляснога драпежніка, ваўчыцу і яе ненароджаных ваўчанят мне ўсё ж было шкада.