Са святам Божага нараджэння і з Новым годам!

Настаяцель ганцавіцкага касцёла Адведзінаў Найсвяцейшай Марыі Панны ксёндз Анджэй Шода

Бог нараджаецца там, дзе  чалавек шукае Яго. Божае нараджэнне – гэта Святло Надзеі для нас, гэта час спаткання з Ім у святыні, у штодзённай малітве,  у сакраманце Пакаяння, у парафіяльнай супольнасці, у дапамозе і падтрымцы асоб хворых, самотных, бедных, адзінокіх, пакрыўджаных.

Праз сваё нараджэнне Хрыстус  хоча, каб зычлівасць, любоў, радасць і спакой гэтага святога дня заўсёды валадарылі ў людскіх сэрцах.  Гэтае  Божае жаданне кожны з вас можа выканаць праз сведчанне штодзённага хрысціянскага жыцця.

Дзелячыся аплаткаю – хлебам любові – забудзьце пра тое, што вас падзяляе. Няхай усе, хто жыве ў вашай сям’і  і адведвае ваш дом, маюць  заўсёды добрыя намеры і будуць шчаслівымі, здаровымі, шчырымі. Пастарайцеся з гэтага моманту быць у адносінах адзін да аднаго больш добрымі, зычлівымі і міласэрнымі.

Будзьце спагаднымі, уважлівымі, умейце падзяліцца сваімі здабыткамі з тымі, каму не хапае сродкаў для існавання ці  хто апынуўся ў складанай  жыццёвай сітуацыі. Сам Пан Бог Міласэрны прызывае нас праз нараджэнне Езуса  быць міласэрнымі да іншых.

Віншую са святам  католікаў, хрысціян іншых канфесій і ўсіх людзей добрай волі. Праўда аб нараджэнні Бога ў абліччы чалавека павінна аб’ядноўваць нас у веры і змаганнях дзеля яе чысціні і пабудовы жыцця на духоўных каштоўнасцях.

Хачу пажадаць вам, паважаныя браты і сёстры, у гэтае свята сапраўднай Хрыстовай радасці, моцнай веры, нязломнай надзеі і братняй любові. Ад шчырага сэрца ўсіх благаслаўляю на свята Божага Нараджэння і на ўвесь надыходзячы 2016 год!