У вёсцы В. Круговічы да 30-годдзя аварыі на Чарнобыльскай АЭС вывелася трохлапае гусяня

“Кура-квактуха ў нас на гусіных яйках сядзіць. Вечарам у нядзелю чую, пішчыць нешта, – расказвае Мікалай. – Аказваецца, вывеліся гусяняты. Забраў іх у кватэру, каб не памерзлі, а гаспадыня і заўважыла, што адно гусяня сярод іх з трыма лапамі”.

Сярод шасці гусянят, была і Лапачка (так назваў журналіст птушаня) – гусяня, якое нарадзілася калекай. У яго на самай справе тры сапраўдныя і сфарміраваныя лапкі. Але… з трох дзейнічала толькі адна. Затое як! Калі гаспадыня Клаўдзія Міхайлаўна паклала птушаня на канапу, каб сфатаграфаваць, незвычайнае гусяня пачало перабіраць адной лапай з такой хуткасцю, што каб пасадзіў Лапачку на ваду, то яна паплыла б не горш, чым з дзвюма.

“Не ведаю, ці выжыве яно і што з ім рабіць, бо хадзіць жа яно не можа і само пакуль не есць, як іншыя гусяняты, – сказала Клаўдзія Хілько. – Будем карміць з рук гэты цуд прыроды”.
Ці ёсць нейкая сувязь з тым, што гусяня вылупілася да 30-годдзя аварыі на Чарнобыльскай атамнай электрастанцыі, застаецца толькі дадумваць. Але вядома, што на навакольнае асяроддзе і здароўе людзей радыяцыя аказала негатыўнае ўздзеянне.

У раённай ветэрынарнай станцыі ўрач сказала, што анамаліі хоць і рэдка, але здараюцца. І звязана гэта з генетычнымі парушэннямі падчас развіцця плода.

Вучоныя кажуць, што выпадкі, калі нараджаюцца птушкі з трыма лапамі, з дзвюма галовамі, здараюцца адзін раз на 10 тысяч. У дзікай прыродзе такое практычна не здараецца. А калі і ёсць выпадкі, то птушкі гінуць у раннім узросце.

У хатніх умовах такія выпадкі бываюць часцей. Мутацыі, якія раней не выяўляліся, рэзка даюць пра сябе ведаць з-за таго, што чалавек выводзіць новыя пароды жывых істот шляхам скрыжавання. Уплыў чарнобыльскай радыяцыі вучоныя не адмаўляюць, але лічаць яго не самым асноўным.