Пенсіянер прапануе распрануць наведвальнікаў паліклінікі

Фото: Ирина Домарацкая

“Гэта ж ідзе, бывае, салідны чалавек, але мінае гардэроб і ў адзенні накіроўваецца далей да кабінета ўрача, там і скідае верхнюю вопратку. Вось так складзіруюць на лаўках у калідоры, а людзям, бывае, і сесці няма дзе, – расказаў па тэлефоне пенсіянер. –  Хоць я інвалід, але ж не лянуюся распрануцца і здаць адзенне ў гардэроб”.

 У кабінет, праўда, пакуль у верхняй вопратцы не ідуць, бо амаль на кожных дзвярах ёсць аб’ява, што ўваход  дазволены толькі без верхняй вопраткі. Таму пенсіянер дае карысную заўвагу тым, хто накіроўваецца да ўрача – не займайце лаўкі адзеннем.

Гараджанін лічыць, што патрэбна забараніць ўваход у вопратцы не толькі ў кабінет урача, але і наогул – далей рэгістратуры. Па словах пенсіянера, калі людзі самі не разумеюць, што ў паліклініцы патрэбна распранацца– значыць, патрэбна адміністрацыі зрабіць прапускны рэжым – паставіць на ўваходзе адміністратара. 

Але такой катэгарычнасці прытрымліваюцца не ўсе наведвальнікі паліклінікі. Напрыклад, Леанід Канановіч з Раздзялавіч, з якім пагутарыла карэспандэнт 22 лістапада каля працэдурнага кабінета, сказаў, што не ўсе наведвальнікі ідуць да ўрача, таму не абавязкова прыбягаць да такой катэгарычнай меры. Ен, напрыклад, сядзеў і чакаў жонку, якая пайшла на прыём. Ёсць людзі, што прыходзяць толькі па фармальнай прычыне, а не на агляд урача. Па яго словах, не абавязкова ўсім здымаць верхнюю вопратку. “Патрэбна ўлічваць, што ёсць розныя сітуацыі”, – сказаў вясковец.  Па яго словах, наогул, людзям патрэбна з разуменнем і цярплівасцю адносіцца адзін да аднаго. А выконваць патрабаванне адміністрацыі паліклінікі наконт таго, здаваць адзежу ў гардэроб ці не – гэта асабістая справа кожнага чалавека.