На Масленіцы ганцаўчане “нашапталі” благое зіме і спалілі яе

Падчас мерапрыемства на плошчы панаваў святочны настрой: гараджане і вяскоўцы сабраліся разам, каб адсвяткаваць сустрэчу вясны і развітацца з ненавіснай ўжо зімой.

Трэба дадаць, што ў гэты дзень зіма ніяк не хацела аддаваць ўладу вясне, і падчас мерапрыемства ішоў густы снег. Аднак прыўзняты настрой удзельнікам свята гэта не сапсавала.

Людзі ласаваліся блінцамі, якія тут былі на любы густ і кошт: ад 0,7 рублёў да 1, 55 рублёў (прадаваліся ў гандлёвай кропцы Ганцавіцкага спажывецкага таварыства).

Супрацоўнікі культурных і навучальных устаноў горада частавалі ганцаўчан за сімвалічную плату “колькі не шкада ў руку пакласці”.

Былі на свяце і іншыя прысмакі – шкваркі, дранікі, бульба ў лушпінні, і шмат іншых. Каля гандляроў збіраліся чэргі жадаючых пасправаваць смачкі.

Падсілкаваўшыся, з задавальненнем ганцаўчане гулялі ў гульні.

Увагу засяродзіў слуп з падарункамі, на які на гэты раз было вельмі цяжка залезці: ад снегу ён мыў мокры і слізкі. Апошні падарунак – цукерк і — са слупа дастаў 14-гадовы вучань СШ№2 Дзяніс.

“Цяжкавата залезці, але я не здаўся”, —  сказаў хлопчык.

Спадабалася ганцаўчанам і фаер-шоў, якое паказалі дзве маладыя дзяўчыны. Каля месца яго правядзення сабраліся амаль усе прысутныя, якія прыйшлі ў гэты дзень на плошчу.

“Во, даюць!” – у захапленні выдыхалі хлапчукі, калі дзяўчаты ў чарговы раз выдыхалі полымя.

Традыцыйна на провадах Масленіцы спальваюць Зіму – сімвалічную саламяную бабу. На гэты раз акрамя агульнай саламянай  лялькі кожны ганцаўчанін мог набысці яшчэ і міні-зіму, якая ўяўляла сабой дрэннае: зайздрасць, ляноту, беднасць, хваробы, сурокі і іншае. Каштавала такая лялька 50 капеяк.

Дарэчы, можна было нашаптаць ёй усё тое дрэннае, што здарылася з вамі ў мінулым годзе,і спаліць яе ў вялікім вогнішчы.

Для асабліва стойкіх удзельнікаў свята, якіх не палохала дрэннае надвор’е, працавала этнадыскатэка. Ганцаўчане танчылі пад народныя спевы.