Дзякуй, кніга першая, “Буквар”!

На свяце развітання з Букваром першакласнікі актыўна ўдзельнічалі ў конкурсах і паказвалі веды, якія набылі за год навучання па сваёй першай кнізе / Фото: Светлана Малышко

Развітацца з першай кнігай-чытанкай прыйшлі першакласнікі з гімназіі г. Ганцавічы (1”А” і 1“Б” класы), СШ №1 (1 “А” і 1”Б” класы), СШ №2, СШ№3 (1”А”, 1”Б”, 1”В”, 1”Г” класы), Любашаўскай ясляў/сада-пачатковай школы, Ганцавіцкай СШ і Агарэвіцкай СШ.

Дзеці з нецярпеннем чакалі пачатку свята. Яны пляскалі ў далоні і раз-пораз пыталіся ў настаўніц: “Калі ўжо пачнуць?..” І вось прадстаўленне пачалося.

На сцэне на працягу ўсяго мерапрыемства гаспадарылі Фея Ведаў – дзяўчынка Маша Шышкіна і “адмоўныя” героі – Букваедзіха, Закарука і Букваморыха. Згодна з сюжэтам Маша Шышкіна згубіла літару “Ш”, і яе знайшлі адмоўныя персанажы. Каб вярнуць літару, Маша з дапамогай усіх першакласнікаў у зале пісала ў паветры згубленую літару, адгадвала загадкі, збірала ў школу партфель. Калі літара вярнулася на сваё месца, першакласнікі ўсе разам паўтарылі алфавіт.

Пасля казачных выпрабаванняў настала пара ўзнагароджання. Усіх настаўніц першых класаў: Таццяну Бурмака і Аляксандру Мініч з гімназіі, Людмілу Літвіновіч і Святлану Цыбульку з СШ №1, Наталлю Сайка з СШ №2, Галіну Мелехавец, Надзею Сярэдзіч, Аллу Сергіеня і Лідзію Кулан з СШ №3, Ірыну Богдан з Любашаўскай ясляў/сада-пачатковай школы, Валянціну Зялёнка з Ганцавіцкай СШ і Алену Мініч з Агарэвіцкай СШ – запрасілі на сцэну і ўручылі ім залатыя медалі за тое, што яны выдатна навучылі першакласнікаў чытаць і пісаць, а таксама іншым навукам.

Прыйшла пара ўручаць дыпломы і самім першакласнікам. Настаўніцы вылучылі лепшых чытачоў сваіх класаў. А супрацоўнікі дзіцячай бібліятэкі ў сваю чаргу назвалі актыўных чытачоў бібліятэкі, якія самастойна наведваюць чытальню. Імі сталі наступныя першакласнікі: Яўгеній Зялёнка, Мікіта Ціхан, Аліна Шышко (1”А” клас гімназіі), Анна Ахрыменя, Мікіта Лагодзіч, Арцём Лятко (1”Б” клас гімназіі), Анастасія Коўш (1”Б” клас СШ №1), Аляксандра Ляўчук (СШ №2), Дмітрый Мелехавец (1”Б” клас СШ №3), Ігар Гулюк, Паліна Лашко, Марыя Рала ( 1 “Г” клас СШ №3).