Біскуп Антоній Дзям’янка удзяліў сакрамант бежмавання

Біскуп Антоній Дзям’янка (у цэнтры) разам з вернікамі, якім удзяліў сакрамант бежмавання. Фота з сайта catholic.by

Святую імшу на беларускай мове ў гэты ўрачысты дзень правіў сам біскуп. Прывітаўшы ўсіх прысутных у касцёле, ён аб’явіў: “Сёння праз маю паслугу група вернікаў, адпаведна падрыхтаваная ксяндзом Алегам, прыме сакрамант Духа Святога, і яны стануць рыцарамі Хрыста ў Касцёле, прымаючы абавязак з большай адвагай, ахвярнасцю ўдзельнічаць ў жыцці Касцёла і адказваць за яго развіццё і місію ў сучасным свеце”.

На пытанне “Што азначае прыняцце сакраманту бежмавання?” ксёндз Алег Шпець адказаў: “Гэты сакрамант (таинство) устаноўлены Езусам Хрыстом для ўмацавання ў веры і хрысціянскай дабрадзейнасці. Хрысціянін праз памазанне святым алеем і малітву атрымлівае ласку Святога Духа непахісна і мужна вызнаваць сваю веру, набожна жыць і, калі будзе патрэбна, аддаць жыццё за Хрыста. У Рымскім абрадзе бежмаванне выконвае звычайна біскуп праз ускладанне рук, знак крыжа алеем святым (мірам) і малітву”.

Удзяліўшы Духа Святога 26-і вернікам рознага ўзросту (падлеткам, дарослым і сталым людзям), біскуп Антоній Дзям’янка звярнуўся да іх з пранікнёнымі словамі: “Прашу, каб з гэтага месца вы выйшлі адноўленымі, каб у веры былі падобнымі да Апосталаў, як навучаў Святы Павел: у любові ўзаемнай будзьце добразычлівымі. У аказванні пашаны адзін аднаго апярэджвайце. Не апускайцеся ў руплівасці. Майце палымяны дух. Выконвайце служэнне Госпаду.Весяліцеся надзеяй . У нягодах будзьце цярплівымі, у малітве – трывалымі”.

Напрыканцы імшы біскуп адзначыў станоўчую працу ўсяго касцёла і асабліва ксяндза Алега, пажадаў далейшых поспехаў у развіцці парафіі.