Дзе можна купіць і парэзаць шкло?

Дзе можна купіць і парэзаць шкло?

“Я абзваніла ўсе гаспадарчыя магазіны райцэнтра – безвынікова, – скардзілася жанчына. – Вось і адкажыце: што нам, вясковым жыхарам, рабіць, дзе шукаць шкло?”

У пошуках адказу журналіст звярнулася да спецыялістаў розных службаў. Аказалася, што на тэрыторыі раёна такой паслугі ніхто не аказвае. У прыватнасці, дырэктар КУП па аказанні паслуг “Ганцавіцкая РКБА” Валянціна Жалезная адказала, што іх служба не аказвае паслугі па продажу і рэзцы шкла, хаця і былі задумкі зрабіць гэта. “Каб парэзаць шкло, патрэбны спецыяліст, а мы яго не знайшлі”, – сказала Валянціна Навумаўна. Гэтую ж прычыну – адсутнасць спецыяліста – назваў і спецыяліст аддзела эканомікі Аляксандр Якубоўскі. Таму ніхто з прадпрымальнікаў раёна, па словах Аляксандра Альбертавіча, не прадае і не рэжа шкло.

Няма такой паслугі і ў райспажыўтаварыстве. Аднак, як запэўніла таваразнаўца прадпрыемства Жанна Крукава, ёсць магчымасць дапамагчы Яўгеніі Іванаўне Кардаш, калі ёй сапраўды трэба шкло. Жанчына можа завітаць у магазіны “Будматэрыялы” або “100 пудоў” (на тэрыторыі рынка) і пакінуць пісьмовую заяву, у якой указаць неабходную колькасць і памеры шкла. У такім выпадку, праўда, прыйдзецца пачакаць, калі будзе выканана заяўка: паездка па тавар фарміруецца па меры заказаў. Спецыяльна па шкло ніхто не паедзе. Калі яго, напрыклад, закажуць у Брэсце, работнікі гандлю заедуць за ім тады, калі адправяцца туды па іншыя тавары.

Акрамя таго, Яўгеніі Іванаўне прыйдзецца аплаціць працэнтаў 10–20 ад заказу. Жанна Анатольеўна заўважыла: “Гэта робіцца для таго, каб потым заказчык не сказаў, што ён перадумаў купляць шкло”.