Год без цыгарэты = ноутбук

Год без цыгарэты = ноутбук

Вызначымся з найбольш папулярнымі маркамі і колькасцю выкураных цыгарэт. Па словах знаёмых-курыльшчыкаў, найчасцей яны купляюць цыгарэты марак “Мінск”, “Kent”, “Карона”, “Winston”. Хтосьці выкурвае менш за пачак у дзень, хтосьці – больш, таму возьмем сярэдняе значэнне – адзін пачак у дзень.

Пасля таго, як у Беларусі з 1 студзеня ў чарговы раз падаражала большасць відаў цыгарэт, розныя віды названых вышэй марак сталі каштаваць: “Мінск” – 7.400 і 7.700 рублёў, “Kent” – 12.500, 15.800 і 16.000 рублёў, “Карона” – 6.500, 7.000 і 7.400 рублёў, “Winston” – 13.500 і 14.500 рублёў. Гэта – прымяняемыя максімальныя рознічныя цэны на цыгарэты з фільтрам на студзень 2014 года, размешчаныя на сайце Міністэрства па падатках і зборах Рэспублікі Беларусь.

Дамовімся, што цэны на цыгарэты і на тавары бяром сённяшнія, без уліку інфляцыйных і іншых працэсаў. Цяпер можам прыступіць да падлікаў. Перамнажаем сярэднія кошты названых марак цыгарэт на 365 дзён у годзе і атрымліваем цікавыя вынікі!

Тыя, хто курыць цыгарэты марак “Мінск” ці “Карону”, за год у прамым сэнсе пускаюць у паветра ад 2 млн 540 тысяч да 2 млн 755 тысяч рублёў. Курцы, якія аддаюць перавагу маркам “Kent” або “Winston”, “пракурваюць” яшчэ больш – ад 5 млн 110 тысяч рублёў да 5 млн 292 тысяч рублёў.

Што можна купіць на гэтыя грошы? Многае з бытавой тэхнікі, напрыклад, халадзільнік, газавую пліту або пасудамыйную машыну. Можна набыць новы ноутбук, планшэт, парковачны радар для аўтамабіля і не самы горшы лічбавы фотаапарат-“зяркалку”. Той, хто пакуль не мае правоў на кіраванне аўтамабілем, можа заплаціць за поўны курс навучання ў аўташколе. Экстрэмалы маюць магчымасць зрабіць не менш як 12 заездаў па 5 мінут гонак на ралійным аўтамабілі, шчодрыя – арганізаваць для дзесяці сваіх сяброў 20-30-мінутны палёт на самалёце АН-2, які занесены ў Кнігу рэкордаў Гінэса. Рамантыкі ж могуць дазволіць сабе і сваёй каханцы атрымаць ашаламляльныя ўражанні ад палёту на паветраным шары або купіць сертыфікаты на 5 – 6 двухгадзінных прагулак вярхом на конях па наваколлі Мінска.

І гэта толькі тое, што актыўныя спажыўцы тытуню губляюць за адзін год! Калі ж прыведзеныя вышэй лічбы памножыць на 10, 20, 30 (стаж курца), дык лічбы ўвогуле ўражваюць.

Напрыклад, чалавек, які выкурвае ў дзень па адным пачку больш таннай “Кароны” (траціць 2 544 050 рублёў за год), за 10 гадоў губляе каля 25 мільёнаў рублёў (больш за 2,5 тысячы долараў), а за 20 – больш за 50 мільёнаў рублёў (г. зн. за 5 тысяч долараў). Аматар цыгарэт “Kent”, які траціць на сваю шкодную звычку 5 292 500 рублёў за год, за 10 гадоў выкідвае на вецер каля 53 мільёнаў рублёў (каля 5,5 тысячы долараў), за 20 гадоў – больш за 105 мільёнаў рублёў (каля 11 тысяч долараў). А гэта ўжо – не проста аўтамабіль, а даволі добры аўтамабіль!

Не будзем зараз разважаць пра тое, што любая шкодная звычка таму так і называецца, што наносіць шкоду нашаму здароўю. Заўважым толькі: каб здароўе паправіць, мы купляем далёка не танныя лекі, а гэта – дадатковыя немалыя расходы, на якія курэц мог бы, напрыклад, пажыццёва “карміць” свой аўтамабіль неабходным яму палівам, радаваць сваіх блізкіх цікавымі падарожжамі і такім чынам паляпшаць жыццё ім і сабе.

Зразумела, кожны чалавек сам робіць выбар: курыць далей ці назаўсёды кінуць цыгарэту. Гэтыя ж падлікі няхай падштурхоўваюць да таго, каб гэты выбар рабіўся разумна, свядома.