Каталіцкія калядкі ў гарадскім Доме культуры

Ксёндз Анджэй Шода благаславіў прысутных на добрыя справы і жыццё ў спакоі і любві / Фото: Андрей Литвинович

На калядкі прыйшлі дзеці, мамы з татамі і бабулі. Настаяцель Ганцавіцкага касцёла Адведзінаў Найсвяцейшай Марыі Панны Анджэй Шода прывітаў усіх прысутных і павіншаваў са святам Нараджэння Хрыстовага, запрасіў іх да ўдзелу ў калядных спевах. Шчыра прывітала гасцей і павіншавала іх са святам начальнік аддзела ідэалогіі, культуры і па справах моладзі Ала Васільеўна Занька.

Вучні нядзельнай школы выступілі перад прысутнымі з інсцэніроўкай Божага нараджэння, так званай “Яселкай”, а таксама праспявалі калядныя песні на беларускай мове. А потым на сцэну выйшлі дарослыя і нават пажылыя вернікі і таксама спявалі калядныя песні на беларускай і польскай мовах. “Падчас супольных калядных спеваў, – выказалася пазней прыхаджанка Людміла Занька, – я адчуваю светлую радасць, веру ў захаванне хрысціянскіх каранёў”. Марыя Рабцэвіч дадала: “Праўда аб нараджэнні Сына Божага ў абліччы чалавека, якая гучыць у калядных песнях, аб’ядноўвае нас у веры і змаганнях дзеля яе чысціні”.