Круговіцкія футбалісты ад традыцый не адступаюць

Падобныя сустрэчы праводзяцца ўжо трэці год запар. На гэты раз футбалісты падзяліліся на дзве каманды па сем ігракоў у кожнай, адна з якіх гуляла ў белых футболках, другая ў сініх. Сама гульня складалася з двух таймаў па трыццаць хвілін адпаведна. Пачатак сустрэчы выдаўся даволі сумбурным. Было відаць, што асобныя футбалісты даўно не выходзілі на поле і ім патрэбен пэўны час, каб успомніць гульнёвыя навыкі.

Бліжэй да сярэдзіны першай паловы гульні каля абодвух варот пачалі ўзнікаць галявыя моманты, але мяч вельмі часта ляцеў куды заўгодна, толькі не ў створ. Лік у сустрэчы адкрыў прадстаўнік каманды “сініх” Аляксандр Заяц, якому пашанцавала з трапным ударам. Аднак ужо бліжэй да перапынку “белыя” не дазволілі свайму саперніку надоўга захапіць галявое лідэрства і зраўнялі лік. Гол на свой рахунак запісаў Сяргей Гайцюкевіч.

Ужо на пачатку другога тайма ўсё тыя ж “белыя” намаганнямі Дзмітрыя Гайцюкевіча не толькі выйшлі наперад, але і павялічылі сваю перавагу да двух галоў. Вымушаныя адыгрывацца “сінія” вялікімі сіламі перайшлі ў наступленне, аднак непрабіўнай сцяною ў варотах стаяў галкіпер “белых” Анатоль Гурман. Аднак і ён не змог адбіць трапны ўдар пяткаю Ігара Мухі.

Паменшыўшы адрыў у ліку, “сінія” яшчэ з большай сілай перайшлі на палову поля саперніка, пры гэтым самі прапусцілі некалькі вострых контратак. Канчатковы лік у сустрэчы 3:2 на карысць “белых”.

Пасля гульні былі вызначаны лепшыя ігракі ў асобных намінацыях, якія атрымалі прызы ад газеты “Ганцавіцкі час”. Лепшым нападаючым прызнаны Эдуард Пакумейка, сярод абаронцаў ігракі вызначылі Ігара Муху, лепшым паўабаронцам стаў Андрэй Муха, лепшым галкіперам – Анатоль Гурман, а прыз сімпатый гледачоў дастаўся Сяргею Гайцюкевічу. Каманда-пераможца таксама атрымала прыз.

Футбалісты далі абяцанне абавязкова сабрацца на чарговы матч у наступным годзе.