Кандыдат у дэпутаты Юрый Хашчавацкі крытыкуе ўладу

Фото: Петр Гузаевский

Хашчавацкі нагадаў, што сёлета спаўняецца 20 гадоў з таго часу, як ён зняў фільм пра Аляксандра Лукашэнку «Звычайны прэзідэнт». У тым жа 1996 годзе, паводле яго слоў, быў распушчаны беларускі парламент і «ўзамен зробленая дэкарацыя — у «палатку» былі прызначаныя дэпутаты ў двукоссях, уся дзейнасць якіх складалася ў тым, каб дружна прагаласаваць за любыя законы, спушчаныя зверху». З тых часоў, заявіў Хашчавацкі, дэпутаты ў Беларусі не абіраюцца, а прызначаюцца «з дапамогай падробкі, хлусні і фальсіфікацыі».

«Я пераканаўся ў гэтым на ўласным вопыце, — расказаў кандыдат. — Чатыры гады таму я быў кандыдатам і запісваў свой выступ у гэтай самай студыі. Запісаў і выступ, і дэбаты. Але ні таго, ні іншага ў эфіры не паказалі. І гэта здарылася не толькі са мной, але і з дзесяткамі іншых кандыдатаў ад Аб’яднанай грамадзянскай партыі».

Эканоміку Беларусі Хашчавацкі параўнаў з пачкам запалак, якія ня запальваюцца: «І ўся наша эканоміка, уся наша прамысловасць, як гэты пачак, існуе толькі для бачнасці».

Кандыдат пералічыў такія актуальныя для беларусаў праблемы, як зніжэнне рэальнай заработнай платы, рост колькасці стратных арганізацый і знешняй запазычанасці. «Чаму ж усё так дрэнна?

Чаму цэны ў крамах растуць з такой шалёнай хуткасцю? Чаму з такой шалёнай хуткасцю растуць колькасць рэзідэнцый прэзідэнта і выдаткі на ўтрыманне арміі чыноўнікаў? Чаму кожны з вас безабаронны перад бязмежжам мянтоў?

Чаму ад бясплатнай медыцыны плакаць хочацца і захавалася адна толькі бачнасць? Чаму так дорага абыходзіцца адукацыя нашых дзяцей?» — задаў пытанні Хашчавацкі.

«Упэўнены, што вы кожны дзень хоць раз пра гэта думаеце. Але вы нічога не робіце, каб гэта змяніць. Вы нічога не зрабілі ў 1996-м, калі знішчаўся парламент. Вы нічога не зрабілі ў 1999-м, калі сталі знікаць вядомыя палітыкі.

Вы нічога не зрабілі ў пачатку 2000-х, калі Лукашэнка падманам прысвоіў сабе права абірацца пажыццёва. Вы нічога не зрабілі, калі ў 2010-м амаль усіх кандыдатаў у прэзідэнты пасадзілі ў турму.

І пасля гэтага вы кажаце, што ў нас слабая апазіцыя? Гэта не апазіцыя слабая, гэта вы, дарагія мае суайчыннікі, слабыя», — рэзюмаваў кандыдат.

Хашчавацкі заклікаў беларусаў «рабіцца моцнымі, навучыцца падтрымліваць адзін аднаго».

«Час вярнуць сабе пачуццё ўласнай годнасці. І пачаць трэба з таго, каб вярнуць скрадзеныя ў вас сумленныя і свабодныя выбары«, — перакананы кандыдат у дэпутаты.