Кругаўцы на 30-е свята вёскі гулялі да ночы

“У нас такога яшчэ ніколі не было, каб кожная арганізацыя аздобіла свой куточак. І ўсё так прыгожа, хадзі ды разглядай, – падзялілася ўражаннем жыхарка вёскі пенсіянерка Антаніна Аўдзейчык. – Тыя разы і людзей на свята збіралася мала. А сёння столькі напрыязджала – больш, чым на вяселлі”.

На свята сабраліся некалькі соцен чалавек, якія з’ехаліся з розных гарадоў і вёсак, і кожны з іх мог знайсці занятак па душы. Гасцей ўдала бавілі працаўнікі арганізацый, якія ёсць у вёсцы. Упершыню свята прайшло ў выглядзе спаборніцтваў, у якіх узялі ўдзел калектывы школы, діцячага садка, амбулаторыі, лясніцтва, гандлю, пошты і выратавальнікаў. Не з’явілася на спаборніцтвы толькі каманда СПК «Крышылавічы». Усе заяўленыя калектывы ўдала прадэманстравалі аднавяскоўцам свае мастацкія, кулінарныя і артыстычныя здольнасці ў конкурсах “Візітка”, “Кулінарнае раздолле”, “Прэзентацыя падворкаў” і на самае артыстычнае выступленне.

Кожная каманда знайшла чым зацікавіць гасцей свята і строгае судзейства. Дзіцячы садок прадэманстраваў заліхвацкія выступленні з удзелам маленькіх выхаванцаў і, бадай, самы маляўнічы падворак з мноствам прыгожа аздобленых страў. Круговіцкае лясніцтва прадставіла намеснік дырэктара Ганцавіцкага лясгаса Наталля Зыбайла, якая паведаміла, што Ганцавіцкі раён – самы лясісты ў Беларусі, і заклікала берагчы лес. Па яе словах, у леса ёсць душа, нездарма лес, дрэвы і наогул прыроду нераўнадушныя людзі ўслаўляюць у вершах і песнях, дарэчы, як гэта падцвердзілі творчыя работнікі лясгаса. Весела і па-заліхвацку, з песнямі, выступілі на свяце прадстаўнікі гандлю – прадаўцы Іна Блінкоўская з Наталляй Гурман і работнікі паштовай сувязі, якую ў творчым конкурсе прэзентавала паштарка Наталля Лелес з дачкой Хрысцінай.

«Без адрыву ад вытворчасці» выступілі мясцовыя медыкі і выратавальнікі. Медыкі з гумарам «палячылі» бабулю ў пастаноўцы на сцэне і прапанавалі лекі ад усіх хвароб у сваім шатры з чырвоным крыжам, дзе кожнаму жадаючаму можна было падысці памераць ціск і атрымаць кваліфікаваную параду.

Выратавальнікі прыцягнулі ўвагу гасцей свята, асабліва дзяцей, тэхнічнай састаўляючай сваёй працы, бо яны адзіныя прыбылі на мерапрыемства на спецмашыне і з абмундзіраваннем, якое многія падыходзілі і прымяралі, каб сфатаграфавацца. Цікавасць моладзі і дзяцей падагравалі водныя пісталеты. З іх можна было пастраляць і ўтварыць фантан, тым больш што надвор’е выдалася цёплае і сонечнае. Адзіная хмарка з дробным дожджыкам зайшла падчас выступлення інспектара РАНС Валерыя Гардзея, які прэзентаваў Круговіцкае падраздзяленне МНС як самае баявое, бо знаходзіцца яно ў цэнтры раёна і круговіцкія пажарныя каманды выязджаюць амаль на ўсе пажары. Вось і падчас свята дзяжурная пажарная брыгада, якая мелася паказаць на магазіне, як аператыўна працуюць выратавальнікі, панеслася на рэальны пажар у Люсіна. У гэтым і асаблівасць спецслужб – працаваць у любых умовах, у будні і ў святы.

Самым яркім суддзі ды і гледачы прызналі выступленне каманды Круговіцкай школы, якая дружна выступала ў кожным конкурсе. Відаць, што загадзя падрыхтаваліся, ну, не былі б гэта настаўнікі. Яны ўсё ўмеюць: і спяваць, і вершы складаць, і смачныя стравы гатаваць.

За перамогу педагогі атрымалі ў падарунак сервіз, які ўручыла старшыня сельскага Савета Святлана Агейка. Салодкія прызы – па слоічку мёду – атрымалі таксама моцныя каманды работнікаў гандлю і дзіцячага садка. Па шматгадовай традыцыі С. Агейка адзначыла гаспадароў лепшых падворкаў сяла, сярод якіх назвала сем’і Аляксандра і Марыі Занька, Івана і Валянціны Віктаровічаў, Наталлі Радзюк. Кожнай сям’і прэзент у падарунак – па мяшку зерня. “У Кругавічах вельмі шмат добрых гаспадароў. Гэта і Гайцюкевічы, і сям’я Заяц, якія ўсё больш і больш упрыгожваюць свае падворкі. Паказальным можна лічыць увесь завулак Лясны. На такіх людзей трэба раўняцца, каб з кожным годам вёска ўсё больш прыгажэла і маладзела”, – сказала Святлана Агейка.

А працавітых людзей у Круговічах шмат. Падчас свята прэміі ды падзякі за руплівую працу атрымалі прадстаўнікі кожнага працоўнага калектыву, якія выступілі. Па традыцыі арганізатары адзначылі мясцовых майстрых Марыю Лелес за выставу вязаных вырабаў і Алену Лелес за выставу прыгожых вышыванак. Свята выдалася вельмі багатым на сюрпрызы і падарункі, якія сыпаліся на працягу ўсяго мерапрыемства. Надзвычай пашанцавала імяніннікам, якія штогод адзначаюць 19 жніўня на свяце вёскі свой дзень народзінаў, Соф’і Бушыла і вядомаму мясцоваму гумарысту Леаніду Блінкоўскаму. Соф’я Фамінічна выйграла ў бяспройгрышнай латарэі за 5000 рублёў суперпрыз – парася. Дарэчы, апошнія гады такога прыза не разыгрывалі. А тут узнавілі традыцыю дзякуючы спонсару – прадпрымальніку Вячаславу Віктаровічу. Жывы прыз дастаўся імянінніцы.

А вядучы мерапрыемства Леанід Блінкоўскі атрымаў падарунак у самым фінале свята. Сябру гумарысту, а таксама ўсім сваім былым аднавяскоўцам і чытачам газеты «Ганцавіцкі час» Пётр Гузаеўскі паабяцаў кампенсаваць выдаткі за білеты на канцэрт Леаніда Блінкоўскага, які традыцыйна праходзіць увечары 19 жніўня.

На бясплатны канцэрт прыйшлі сотні гледачоў. “Ну такога аншлагу я не чакаў”, – прызнаўся са сцэны артыст Леанід Блінкоўскі. Такім чынам, свята атрымала нечаканы працяг і кругаўцы адпачывалі да цямна. “Класна павесяліліся. Даўно так не адпачывала”, – падзялілася ўражаннямі жыхарка вёскі Любоў Лелес.

Дарэчы, у мінулыя выхадныя святы адбыліся ў вёсках Макава, Нача, Малыя Кругавічы. У кожным мястэчку гулялі з размахам. У Малыя Кругавічы нават завіталі зоркі Еўрабачання «буранаўскія бабулькі», якія так сплясалі, што вяскоўцам хопіць запалу на цэлы год – да наступнага свята.