Няма скаргі – і працуюць без прагі?

“У аб’яве было напісана, што работы пачнуцца 15 мая і закончацца 30 мая. Ваду, праўда, далі дзень у дзень, як абяцалі. А вось тое, што вырылі, не засыпалі дагэтуль, – расказала Надзея Якаўлеўна. – Прыедуць рабочыя ЖКГ, пасядзяць з паўгадзіны – і пайшлі. Затое нашы дзеці “асвойваюць” ямы. Ды і небяспечна: я працую на КПД, бывае, іду з другой змены ў цемры і кожны раз баюся ўпасці на гэтыя трубы”.

Расказалі жанчыны і пра яшчэ адну непрыемнасць. Дажджы сёлета ідуць часта, і вада з латкоў, у якіх ляжаць трубы, сцякае напрасцяк у іх падвалы…

Пакуль журналісты разбіраліся з сітуацыяй, па скайпе прыйшло пісьмо ад Надзеі Савені: “Дзякуй за дапамогу. Праз два дні пасля таго, як мы звярнуліся да вас, работнікі ЖКГ усё засыпалі пяском. Вось толькі прыходзіцца хадзіць па калена ў брудзе, бо пліты на месца ніхто так і не паклаў. Хіба нам самім наймаць кран? І што гэта за адносіны, не магу зразумець: без скаргаў нашы некаторыя адказныя асобы нічога не хочуць рабіць…”

З пытаннем: “Чаму так адбылося, што тэрмін пракладкі труб замест двух тыдняў расцягнуўся на месяц і работы не да канца завершаны нават сёння?” – журналіст звярнуўся да начальніка ўчастка кацельнай гаспадаркі КУШВП ЖКГ “Ганцавіцкая РЖКГ” Дзмітрыя Казакевіча.

Вось што адказаў Дзмітрый Іванавіч: “Загваздка была ў падвозцы неабходных 100 кубоў пяску. У ЖКГ няма сваёй тэхнікі. Мы звярнуліся па дапамогу ў падрадную арганізацыю, ПМК-14, чыя тэхніка на той час была занята на аб’ектах. Прыйшлося чакаць.

Тое ж і з плітамі: як толькі з’явіцца магчымасць (думаю, на гэтым тыдні), пакладзём іх на месца. Пасля таго, як работы закончацца, вада перастане сцякаць у падвалы”.

Дзмітрый Казакевіч патлумачыў таксама, што спецыяльна створаная брыгада па знадворных (вонкавых) сетках мяняе старыя стальныя трубы на новыя ў ПЭТ-абалонцы – у рамках Рэспубліканскай праграмы энергазберажэння на 2011–2015 гады. Гэтая мера дапаможа значна зменшыць цепластраты. Усяго ў 2013 годзе ў горадзе Ганцавічы будзе заменена 3 кіламетры 500 метраў цепласетак.