У Брэсцкай вобласці зноў пройдзе свята народнага гумару: што пра яго вядома

Абвешчана праграма абласнога свята народнага гумару “Спораўскія жарты”, якое сёлета адбудзецца 10 чэрвеня 2023 года. Традыцыйна ў межах свята адбываюцца конкурсы на лепшую гумарыстычную праграму, прыпеўку, жартоўную песню і танец. Таксама абіраюць самую прывабную печаную гумарыстычную скульптуру.

Жыхары аграгарадка Спорава маюць цудоўную магчымасць паказаць сваю гасціннасць, гаспадарчую руплівасць і спрыт. Справа ў тым, што вяскоўцы  прымаюць удзел у выставе-аглядзе сваіх падворкаў.

Паводле абвешчанай праграмы свята, урачыстае адкрыццё фестывалю народнага гумару “Спораўскія жарты” прызначана на 12 гадзін. Адбудзецца яно на пляцоўцы каля Спораўскага цэнтра культуры і вольнага часу. Само адкрыццё пройдзе пад назвай “Віват, свята гумару і весялосці”.

Пасля гэтага (у 12.45) адбудзецца швэнданне па падворках Спорава “Якія мы гаспадары, такія нашыя двары”. Яшчэ праз паўгадзіны (у 13.15) пачнуцца конкурсныя праграмы “Лепш жартаваць, чым гаварыць”. Іх можна будзе ўбачыць на галоўнай канцэртнай пляцоўцы.

У 17.00 запланаваны канцэртныя выступленні гасцявых калектываў Брэсцкай вобласці “Сум з вачэй, цяжар з плячэй”. На 19 гадзінаў прызначана цырымонія ўзнагароджання пераможцаў конкурсных праграм “Хвіліна поспеху, альбо Кот у меху”. Пасля яе (у 19.30) працягнуцца канцэртныя выступленні гасцявых калектываў вобласці. Іх праграма мае назву “Год за годам, а мы ў Спорава карагодам”.

У 20.30 удзельнікаў і гасцей фестывалю запрашаюць на канцэртна-гумарыстычную праграму артысткі гумарыстычнага жанру Зінаіды Фурор. Далей (у 21.15) запланаваны канцэртныя выступленні калектываў аматарскай творчасці Бярозаўскага раёна “Спявай песні, хоць трэсні”.

Завершыцца свята народнага гумару ў Спорава дыскатэкай “Скокі да ўпаду” (23.00 – 02.00).