Са сталіцы вярнуліся дыпламантамі і лаўрэатамі

Дыплом лаўрэата 1 ступені эстрадна-харэаграфічная студыя “Удых танца” атрымала за танец “Іспанскія матывы”. Кіраўнік калектыву Алена Варэйка і балетмайстар Ірына Меляшчук задаволеныя вынікам. “На такім конкурсе мы выступалі ўжо другі раз. Мінулагодні конкурс, праўда, меў іншую назву – “Новыя вяршыні-2013”, з яго мы прывезлі дыплом 2 ступені. Сёлета выступілі яшчэ больш удала”, – расказала Алена Аляксандраўна. Дарэчы, яна заўважыла, што за лепшы харэаграфічны нумар конкурсу калектыў запрасілі на гала-канцэрт, які пройдзе 27 сакавіка ў Мінску.

Трыа інструменталістаў у складзе Дар’і Рылка (фартэпіяна), Ангеліны Малышкі і Анастасіі Піваварчук (скрыпка), якія ўзялі дыплом 3 ступені, і вакалісты эстраднага аддзялення ДШМ Паліна Клявец, Анастасія Іванова, дуэт у складзе Мілены Дрозд і Валерыі Навіцкай, што сталі дыпламантамі конкурсу, на сталічныя творчыя спаборніцтвы такога ўзроўню трапілі ўпершыню. І тым больш радуюць поспехі рабят іх кіраўнікоў – Алу Шэйко і Алену Барбус.

“Акрамя радасці, што нас прыкмецілі, і дарослыя, і дзеці атрымалі шмат станоўчых эмоцый”, – заўважыла Алена Вячаславаўна. Стомленыя, але шчаслівыя вярталіся канкурсанты са сваімі кіраўнікамі дамоў. І не дзіўна! З самай раніцы і да позняга вечара доўжыліся спаборніцтвы. Толькі а дзясятай гадзіне пачалося ўручэнне ўзнагарод.Настаўнікі ДШМ акцэнтуюць увагу на тым, што самі яны з дзецьмі проста не змаглі б дабіцца такіх поспехаў. З Фонду міру былі выдзелены грошы на паездку. Транспартам забяспечыў артыстаў начальнік ЧБУП “Пінсксаўгасбуд – ПМК-14” Віктар Карпач. Напрамую меў дачыненне да дасягнутых поспехаў вадзіцель ПМК-14 Яўгеній Гурман. “Ён нас проста выручыў! Мы паспелі своечасова трапіць на конкурс, і на працягу ўсёй паездкі Яўгеній Мікалаевіч з разуменнем адносіўся да ўсіх нас”, – расказалі настаўнікі ДШМ.

Сапраўднай палачкай-выручалачкай для юных артыстаў сталі і іх бацькі. Падтрымка заўсёды каштоўная, а творчыя людзі асабліва ўмеюць ацаніць аказаную дапамогу. “З намі некаторыя бацькі нават ехаць у Мінск збіраліся. На жаль, месца ў аўтобусе было для ўсіх малавата. Тым не менш, уся шматдзетная сям’я Паліны Клявец сваім ходам прыехала «пабалець» за нас!” – расказала Алена Барбус. А яшчэ настаўнікі наперабой расказвалі, якія прыгожыя касцюмы бацькі іх выхаванцаў сшылі сваім дзецям за ўласныя сродкі!

Не дзіўна, што пры такой матэрыяльнай і маральнай падтрымцы выхаванцы ДШМ паказалі вынікі, якімі можна смела ганарыцца. Так што ведай нашых! І ў сталіцы не прападзём!

Даведка “ГЧ”
На эстраднае аддзяленне Дзіцячай школы мастацтваў запрашаем таленавітых дзяцей ад 6 да 9 гадоў, якія ўмеюць спяваць і жадаюць набыць прафесійныя навыкі сольнага вакальнага выканання. Кантактны тэлефон: 94-000-73 (Velсom).