Сям`я Кладзько – сярод прызёраў абласнога конкурсу “Уладар сяла”

Арганізатары конкурсу крыху змянілі ўмовы раённага этапа конкурсу, крыху іх ускладніўшы, пры гэтым галоўнай тэмай былі беларускія традыцыі. Усяго ўдзельнікам трэба было прайсці шэсць іспытаў: прадставіць візітоўку “Вітаем па-беларуску”, конкурсы “Па дровы”, “Вясковая эстафета”, “Сялянскія прысмакі”, “Выстава дасягненняў сямейнай гаспадаркі” і “Лепшы сельскі падворак”.

Па словах Веры Кладзько, да ўдзелу ў спаборніцтвах дапускаліся каманды толькі ў нацыянальных касцюмах, ды і ў конкурсе “Сялянскія прысмакі” большай адзнакі заслугоўвалі таксама традыцыйна беларускія стравы. Яшчэ на суд журы ўдзельнікі павінны былі прадставіць фотаальбом са здымкамі свайго падвор`я, як яны яго аздабляюць і ўпрыгожваюць.

Па словах Веры Кладзько, напярэдадні конкурсу яна ўсю ноч, бадай, не спала, хвалявалася.

“Хацелася быць не горшымі за іншыя каманды, як след прадставіць наш раён, заявіць аб сабе, – сказала Вера Пятроўна. – Калі пасля першага і другога конкурсу мы зразумелі, што ідзём у першых радах, то вельмі радаваліся. Нас нават азарт узяў, асабліва падчас “сялянскай эстафеты”, бо хацелася трапіць у тройку фіналістаў!“

Па словах жанчыны, журы прыйшліся даспадобы стравы беларускай кухні, якія яна прыгатавала: дранікі з мясам і галушкі з мясам.

“Іншыя каманды гатавалі караваі, пірагі і нават курыцу запечаную. У нас жа была беларуская кухня, і мы не прагадалі: журы з задавальненнем спрабавалі тое, што я нагатавала, і вельмі хвалілі“, – расказала Вера Пятроўна.

Конкурс “Па дровы” запомніўся канкурсантам тым, што падчас яго сем`і павінны былі распілаваць бервяно на тры часткі, пасекчы іх на дровы і ўжо з іх выкласці слова “лад”.

За перамогу ў абласным этапе конкурса “Уладар сям’я” сям`я атрымала мульціварку і ганаровую грамату. А вось прадстаўляць Брэстчыну  на рэспубліканскім этапе “Уладара сяла” будуць фіналісты конкурса.

“Нам казалі, што сем`і з гэтага раёна ўжо не першы год становяцца пераможцамі. Таму трапіць у тройку фіналістаў, дзе вельмі вялікая канкурэнцыя і моцныя сапернікі – вельмі прэстыжна, я лічу. Мы вельмі рады такому выніку“, – сказала Вера Кладзько.