За розыгрыш прызоў без рэгістрацыі — “Савецкае Палессе” па закону павинен быць штраф ад 50 да 500 базавых велічынь

Адказваючы на пытанні чытачоў газеты “Ганцавіцкі час” і іх прапановы правесці розыгрыш, падобны на той, які аб’явіла рэдакцыя газеты “Савецкае Палессе”, хочацца засцерагчы калег з “СП”, а жыхароў Ганцаўшчыны, у тым ліку і чытачоў “ГЧ” (бо многія выпісваюць дзве газеты) – розыгрыш можа і не адбыцца.

Гэта рэкламная гульня і правесці яе зараз не так проста, як раней. Заканадаўства для СМІ змянілася, каб правесці розыгрыш, патрэбна прайсці рэгістрацыю розыгрышу ў Міністэрстве гандлю, устаноўленую Указам Прэзідэнта Рэспублікі Беларусь ад 30 студзеня 2003 г. № 51 «Аб правядзенні рэкламных гульняў у Рэспубліцы Беларусь”. Працэдура гэта не бясплатная і патрабуе часу.

“Савецкае Палессе” рэгістрацыю не прайшло – гэта факт. На сайце Мінгандлю Рэспублікі Беларусь па стане на 29.11.2013 года (абноўлена 2 снежня) “Савецкага Палесся” няма ў спісе зарэгістраваных.

У правілах правядзення рэкламнай гульні ёсць 14 пунктаў, якія патрэбна выканаць і якія павінны ўтрымлівацца ў рэкламе розыгрышу. У «СП» няма нумара рэгістрацыі, складу і памеру прызавога фонду і крыніц яго фарміравання, складу камісіі з прозвішчамі і пасадамі і шмат чаго іншага. Акрамя таго, павінен быць адкрыты асобны рахунак для розыгрышу.

Зараз “Савецкаму Палессю” трэба думаць, як выкруціцца з гэтай сітуацыі, каб не падмануць чытачоў, і спадзявацца, што рэдакцыю пранясе і яе не прыцягнуць да адміністрацыйнай адказнасці.

За парушэнне заканадаўства аб рэкламе (у дадзеным выпадку ч.2 арт. 12.15 Кодэкса аб адміністрацыйных правапарушэннях), нават мінімальны штраф на юрыдычную асобу складае 6,5 млн рублёў. Вядома ж, рэкламавацца далей ім таксама нельга, бо памер штрафу можа вырасці да 65 млн рублёў.

Прапанову правесці розыгрыш мы скарыстаем і пастараемся правесці яго пры падпісцы на 2-е паўгоддзе. А на час гэтай падпісной кампаніі рэдакцыя “Ганцавіцкі час” вырашыла частку сродкаў, якія вы аддасце на падпіску, пералічыць на добрую справу. У нас у раёне ёсць дзеці, у якіх няма цацак і якія каштуюць цукеркі толькі на Новы год ці па святах. Ёсць дзеці-інваліды, якім таксама патрабуецца дапамога.

Таму ў рамках акцыі, якую, спадзяюся, падтрымаюць і іншыя, ад кожнага з вас, хто падпішацца на “Ганцавіцкі час”, будзе зроблены ўклад у добрую справу, каб дзеткі атрымалі падарункі і хвіліны шчасця. Гэта, лічым мы, даражэй за прызы.