Умілаваныя ў Хрысце браты і сёстры!

Праз сваё нараджэнне Хрыстос прагне вылечыць нашыя сэрцы сваёй любоўю. Хоча, каб зычлівасць, любоў, радасць і супакой гэтага святога дня заўсёды валадарылі ў нашых сэрцах. Ён прыйшоў на свет, каб навучыць нас змагацца з нашымі людскімі слабасцямі: як перамагаць зло дабром, нянавісць – любоўю, хлусню – праўдай, абыякавасць – клопатам і спачуваннем.

Ламаючыся аплаткам і складаючы ўзаемныя пажаданні, забудзьма пра тое, што нас раздзяляе. Пастараемся з гэтага моманту быць у адносінах адзін да аднаго больш добрымі і зычлівымі.

Віншую католікаў і тых хрысціян, якія сёння адзначаюць Нараджэнне Хрыста. Віншую братоў праваслаўных, якія перажываюць пост і рыхтуюць дарогу прыходзячаму Збаўцу.

Праўда аб уцелаўленні Бога павінна аб’ядноўваць нас у веры і змаганнях дзеля яе чысціні, захавання хрысціянскіх каранёў і будавання жыцця на духоўных каштоўнасцях.

Хачу пажадаць вам, паважаныя браты і сёстры, у гэтае свята сапраўднай Хрыстовай радасці. Няхай зорка Пана не перастае свяціць у нашых сэрцах, указваючы нам шлях праўды, любові і супакою.