Цна ўпадае ў Прыпяць, а каналізацыя ў Цну?

Акрамя таго, па вялізным адрэзку вуліцы Будаўнікоў прайсці-праехаць немагчыма: смурод стаіць на ўвесь акалотак! І жыхары бліжэйшых дамоў вымушаны ўдыхаць менавіта яго, а не пах чыстага паветра. Дарэчы, жыхары і іншых, “запуцейскіх” вуліц, пачынаючы з лета, не раз звярталі нашу ўвагу на смурод, з-за якога яны не могуць адчыніць форткі і праветрыць свае дамы.

На нашы пытанні, што з’яўляецца прычынай забруджвання паветра, дырэктар КУШВП ЖКГ “Ганцавіцкая РЖКГ” Аляксей Галяк адказваў, што ўсё праверана, усё ў парадку. У мінулую нядзелю, 29 снежня, журналіст зноў звярнулася да А. Галяка і папрасіла пракаменціраваць, чаму сцёкі з каналізацыйных калодзежаў выліваюцца ў ліўнёвы канал. Сказала таксама, што чытачы “ГЧ” бачаць у гэтым экалагічную катастрофу для нашага райцэнтра, бо ліўнёвы канал вядзе ў Цну.

Аляксей Фёдаравіч у адказ спачатку заявіў, што ліўнёвы канал не ўпадае ў Цну. Удакладніў, калі мы выявілі і сфатаграфавалі праблемныя месцы. А потым зусім нечакана заявіў: “А вы ведаеце, што ў мяне сёння выхадны?!”. І… паклаў трубку.

З гэтай праблемай 30 снежня мы звярнуліся да начальніка Ганцавіцкай раённай інспекцыі прыродных рэсурсаў і аховы навакольнага асяроддзя Юрыя Шапеля. Ён сказаў, што аб праблеме яны ведаюць. “Названы ліўнёвы канал вядзе не ў Цну, а ў адстойнік, – адказаў Юрый Рыгоравіч. – Мы бралі аналізы ў канале і ў рэчцы таксама. Што датычыцца Цны, парушэння норм няма”. А вось з ліўнёвым каналам справы ідуць інакш, таму інспектары збіраюцца скласці адміністрацыйныя пратаколы і прыцягнуць ЖКГ да адміністрацыйнай адказнасці.