У Дзяніскавічах шматдзетная маці была гатова начаваць на вуліцы

У старэнькай хаце жылой плошчай 27,6 квадратных метраў, якую каля дзесяці гадоў таму купіла Алена Гусакова, маці шасці дзяцей, па яе словах, прапісана 10 чалавек.

У хаце жылі 9 чалавек. Старэйшы сын 25-ці гадоў паехаў на заробкі ў Расію, 26-гадовая дачка жыве ў Ганцавічах. А вось Алена Валяр’яўна з двума сынамі 16-ці і 5 гадоў, якія маюць розныя ступені інваліднасці, дачкой 19-ці гадоў і дачкой Вольгай Гаркавай 22-х гадоў жылі разам у двух невялічкіх пакоях. У Вольгі сваіх трое дзяцей (1.6, 2.9 і 4.5 гадоў) і муж, з якім яны жывуць грамадзянскім шлюбам.

Ужыцца дзве гаспадыні не могуць нават у двухпавярховым палацы, а тут у хатцы людзей, бы кількі ў кансервавай банцы. Вольга стала на ўлік для атрымання льготнага крэдыту на пакупку ці будаўніцтва жылля, але пакуль добрых навін для яе няма. Не раз ужо гаспадыні канфліктавалі і раз’язджаліся, а на гэты раз канфлікт разгарэўся паміж імі не на жарт.

Вольга Гаркавая сама пазваніла на гарачую лінію “ГЧ” і са слязьмі расказала пра сітуацыю, якая склалася. Выехаўшы на месца, аўтар гэтага артыкула выслухаў жанчын. Напярэданні прыязджала і міліцыя, але ці можна разабрацца ў сямейных неладах, калі ў кожнага свая праўда?

Што не падзялілі маці і дачка, няхай застанецца іх сямейнай справай. Бо тое, што скандаляць дарослыя, ужо нікога не здзіўляе. Але ж пакутуюць непавінныя дзеці.

Каб неяк уладкаваць пытанне, аўтар гэтага артыкула звярнуўся да тых, хто мог дапамагчы. Старшыня сельсавета Людміла Дубоўская і дырэктар АТТ “Ганцавіцкі райаграсэрвіс” Міхаіл Сергіеня праявілі міласэрнасць і не пакінулі дзяцей на вуліцы. Іх адносіны заслугоўваюць найлепшых слоў і з’яўляюцца прыкладам чалавечых і добразычлівых адносін да людзей. Дзякуючы Людміле Міхайлаўне і Міхаілу Рыгоравічу ў той жа дзень, літаральна за паўгадзіны пасля таго, як журналіст паведаміў ім пра сямейны канфлікт, Вользе і яе деткам ў Дзяніскавічах знайшлося часовае жыллё.

Можа, пазней жанчыны памірацца. Ці ж можна, каб родныя людзі рабіліся ворагамі? Які ж прыклад падаюць яны дзецям і ўнукам?