Пасля стыхійнага сходу магазін узнавіў працу

На «гарачую лінію» «ГЧ» жыхары Будчы пазванілі ў другой палове дня і паведамілі, што з магазіна вывозяць усе прадукты і вязуць іх у другі магазін. “У мінулым годзе у красавіку магазін гэты адрамантавалі і ўрачыста адкрылі, Селюжыцкі і Саланевіч падымалі бакалы! Людзі так радаваліся, а сёння зачыняюць! Навошта ж сродкі ўкладалі!?», – гаварыла жанчына па тэлефоне.
Праз паўгадзіны рэдактар “ГЧ” быў каля магазіна ў Будчы, дзе сабралася каля 30-ці чалавек (у асноўным гэта былі жанчыны). У магазіне сапраўды былі пустыя паліцы, а мужчыны загружалі ў фургон рэшткі тавараў.

“Нам кажуць, што закрываюць часова, можа, на тыдзень ці два, але ж усе тавары вывозяць падчыстую, – сказала жыхарка Будчы Валянціна Кандраценя. – Некаторым дабрацца да таго магазіна ўжо не пад сілу, бо ісці да яго больш за кіламетр”.
“Нам кажуць, што прадавец звальняецца, а нікога знайсці на яе месца не могуць, – дадае Любоў Савеня. – Канешне, звальняюцца. А што рабіць ёй? Класці ў касу сваю зарплату? Сюды пруць дарагія каўбасы – а хто іх тут будзе браць? Няхай даюць тое, што бяруць людзі. Каму патрэбна тая іхняя хурма?”

Па словах жанчын, ёсць людзі ў Будчы, якія пайшлі б на працу ў гэты магазін, але аднаму чалавеку справіцца складана, ды яшчэ навязваюць заказваць тавары, якія сяльчане не купляюць.
Пазіцыя спецыялістаў гандлю іншая. “Няхай людзі не абураюцца: гэта часова, бо няма прадаўца. Магазін потым будзе працаваць. А пакуль не можам знайсці работніка. Не хочуць ісці працаваць”, – адказала дырэктар гандлёвай зоны Алена Мелехавец.

Аднак яе аргументы і тлумачэнні будчакі слухаць не хацелі. Людзі былі ўзрушаныя, што кіраўніцтва райпо не можа вырашыць праблему і знайсці прадаўца. Некаторыя казалі, што будуць скардзіцца ў Адміністрацыю Прэзідэнта і не толькі на новага старшыню райспажыўтаварыства, але і на раённую ўладу.
Прапанову рэдактара «ГЧ» пазваніць у райвыканкам і звязацца з Аляксандрам Саланевічам жыхары падтрымалі.
Як аказалася, Аляксандр Паўлавіч быў не ў курсе часовага закрыцця магазіна. “Не для таго магазін адкрывалі, каб яго закрываць!” – сказаў старшыня райвыканкама.
Кіраўнік раёна пасля кароткай тэлефоннай размовы разабраўся аператыўна. Праз 15 хвілін да людзей выйшла дырэктар зоны Алена Мелехавец і з добразычлівай усмешкай сказала: “Паважаныя жыхары! З заўтрашняга дня магазін будзе працаваць”.

Людзі радаваліся і дзякавалі, праз газету прасілі перадаць асабістую падзяку старшыні райвыканкама Аляксандру Саланевічу. “Цяпер бачым, што ён заступіўся за народ, і вялікую яму падзяку перадайце ад будчакоў, так і напішыце”, – сказала маладая жанчына.

Да таго часу, пакуль знойдзецца новы прадавец, у гэтым магазіне згадзіліся працаваць па чарзе прадаўцы з цэнтральнага магазіна “Прадукты”, дзе іх працуе трое.

У аўторак старшыня райспажыўтаварыства Аляксандр Кулак выказаў непаразуменне тым, што людзі паднялі бунт. “Гэта нашы ўнутраныя праблемы, мы іх самі павінны вырашаць, – сказаў па телефоне Аляксандр Іванавіч. – Людзям жа растлумачылі, што вывезлі прадукты, якія хутка псуюцца, а магазін праз некалькі дзён адчынілі б, бо новаму прадаўцу трэба прайсці медагляд, уладзіць іншыя пытанні па працаўладкаванні. Вось калі мы не выканалі б абяцанне, тады хай бы і скардзіліся”.