Трактарысты з “Дубнякоў” бунтавалі з-за шнуркоў

“Немагчыма працаваць! Шнуркі намотваюцца, больш часу ідзе, каб абразаць іх на валах, а то інакш раскідвальнік угнаенняў не працуе, – скардзіўся трактарыст Аляксандр Васілеўскі, які пазваніў рэдактару “ГЧ”. – Ладна, тры-чатыры разы абрэзаць за дзень гэтыя шнуркі, а то ж прыходзіцца амаль пасля кожнага рэйса. Вось хай паглядзяць, як гэта лёгка. Ды і старшыня Уладзімір Грыгаран папярэджваў, каб не кідалі шнуркі разам з саломай”.
У в. Кукава выязджаў аўтар гэтага артыкула. У машынна-трактарным парку, дзе сабраліся трактарысты і спецыялісты, яму расказалі, што за гэты дэмарш дырэктар Уладзімір Грыгаран спачатку адхіліў трактарыстаў ад працы і хацеў запрасіць работнікаў з іншай арганізацыі.
Уладзімір Ваганавіч патлумачыў, што ён не адабрае паводзіны трактарыстаў, бо зараз трэба працаваць, а не наладжваць дэмаршы. Але прэтэнзіі трактарыстаў часткова прызнаў абгрунтаванымі.
Па словах Аляксандра Васілеўскага, праз некаторы час кіраўнік распарадзіўся, каб спецыялісты ААТ “Дубнякі” абразалі шнуркі, і толькі пасля гэтага трактарысты паехалі працаваць.
“Дралі шнуркі па чатыры чалавекі на кожным з трох раскідвальнікаў. Толькі з верхніх “крывачоў”, можа, 40 хвілін абразалі, – сказаў механізатар ужо па тэлефоне. – І хоць вінавацяць нас і агранома, але, можа, зразумеюць, нарэшце, што калі адзін пра аднаго не будзем клапаціцца, то гэта ж шкодзіць усім нам і гаспадарцы таксама”.