Баранавічы – Лагішын – шлях пілігрымаў да Божай Маці

Пераадольваючы кіламетры шляху, дзеці, моладзь і пажылыя вернікі ідуць з Баранавіч з касцёла Святога Зыгмунта ў Лагішын, дзе знаходзіцца цудадзейны абраз Маці Божай Лагішынскай – Каралевы Палесся.

«Неяк раней я не надаваў значэння, а потым адчуў, што сілы ў падарожжы дае Бог. Чатыры дні ў дарозе з агульнай малітвай вельмі падымаюць настрой», – выказаўся адзін са старэйшых пілігрымаў, 63-гадовы ганцаўчанін Валерый Матуліс. – Іду, каб памаліцца за Ганцавічы, за ўсіх родных, за дзяцей і ўнукаў».

На ўдзел ў пілігрымцы Валерыя натхніў у свой час ксёндз Алег Шпець. І вось ужо пяты год запар Валерый Матуліс праходзіць паломніцкі шлях. Ён едзе ў Баранавічы, каб з самага пачатку пілігрымкі несці паломніцкі крыж наперадзе малітоўнай працэсіі.

У гэтым годзе ў 19-ай па ліку пілігрымцы ўзялі ўдзел 130 чалавек. Сярод іх Станіслаў Жагунь з Мядзведзіч, якому 68 год. «Рух – гэта жыццё», – кажа С. Жагунь. Ён ідзе пяты год і кажа, што спадзяецца хадзіць з пілігрымамі яшчэ 12 год, каб дацягнуць да свайго 80-годдзя.

Самая старэйшая з пілігрымаў – 69-гадовая Ірына Фірус з Ляхавіч. Яна падарожнічае з пілігрымамі дзясяты год. «Мне ўсё жыццё дапамагае Маці Божая, таму іду падзякаваць Ёй і ў дарозе малюся за пляменніка, каб пакінуў піць, – дзеліцца І. Фірус. – Бывае цяжка ў дарозе, але я веру, што Бог дапаможа». Яна 38 гадоў працавала старэйшай медсястрой ў ляхавіцкай бальніцы. Была ініцыятарам таго, каб у Рачканах пабудавалі касцёл і ўжо колькі год прымае актыўны ўдзел у яго дзейнасці, а цяпер разам з пілігрымамі не перастае маліцца Богу аб умацаванні сваёй веры.

Кожны год да пілігрымаў далучаюцца новыя адважныя маладыя людзі з сэрцамі, якія прагнуць праслаўляць Бога праз удзел у пілігрымках. Як расказала 16-гадовая Вольга Лявошка, яна ідзе з пілігрымамі чацвёрты раз. У гэтае падарожжа Вольга прывяла і сваю маці з 12-гадовым братам Аляксандрам. Але самым малодшым пілігрымам можна лічыць сябра сямейства Лявошыкаў 10-гадовага Антона Лазюка. «Ісус за нас памёр на крыжы, і я з радасцю іду з пілігрымамі ў знак ўдзячнасці Богу і праслаўляю яго імя, – гаворыць Вольга Лявошык. – Супольная малітва вельмі ўзмацняе веру».