На вуліцы Маякоўскага рух ЗАБАРОНЕНЫ

У наш час аўтамабіль стаў патэнцыяльнай пагрозай  як для жыцця яго ўладальніка так і для пешаходаў.

Нягледзячы на тое, што кожны год ДАІ праводзіць розныя акцыі па забеспячэнні дарожнай бяспекі, амаль штодзень у сродках масавай інфармацыі паступаюць навіны аб дарожна-транспартных здарэннях, і даволі часта з смяротнымі вынікамі. Гэтыя сумныя падзеі бываюць як па віне вадзіцеляў, так і пешаходаў.

Мяне ўвесь час хвалюе тое,  што адбываецца па вуліцы Маякоўскага. Яна жыццёва важная артэрыя горада, працягнута  ад аўтастанцыі да мікрараёна, дзе жыве асноўная колькасць жыхароў Ганцавіч. На жаль, пешаходных дарожак на ёй не існуе. Вуліца вузкая, тут двум аўтамабілям цяжка размінуцца. А ўявіце сабе, які рух на ёй уранку. Дзеці па вуліцы ідуць  у гімназію ці ў  СШ №1, дарослыя – на працу, пасажыры спяшаюцца на ранішні дызель, і гэты людскі водаварот на вузенькай дарозе. Тут жа на вялікай хуткасці імчацца машыны. У асноўным вязуць бацькі сваіх дзяцей да ўстаноў адукацыі. І гэта нягледзячы на тое, што едуць яны пад знак, забараняючы рух на гэтай вуліцы. Мала таго, нейкі ліхі вадзіцель, не ўпісаўшыся ў паварот, збіў гэты знак, які два дні так і валяўся на дарозе. Дзякуй Богу, што былі навагоднія святы і бяда нікога не кранула.

Як кажуць у народзе, “Пакуль гром не грымне, мужык не перахрысціцца”. Чаго ж нам чакаць таго грому? Таму праз газету звяртаюся да супрацоўнікаў ДАІ, каб падзяжурылі некалькі дзён і пакаралі тых, хто парушае правілы дарожнага руху. І паведамілі б праз газету прозвішчы тых, хто стварае небяспеку для людзей. Магчыма, тады і іншыя, нарэшце, убачаць знак, што рух па Маякоўскага забаронены.