Рэкорды Аляксея Галаскока: не вагой, а колькасцю

Але ў ганцавіцкіх рыбакоў ёсць і іншыя рэкорды. У вядомага нашым чытачам паэта Аляксея Галаскока, які таксама захапляецца зімовай рыбалкай, рэкорды, як кажуць, не ў якасці, а ў колькасці. За некалькі паездак на возера Дзікае ў студзені Аляксей Пятровіч злавіў каля 25 шчупакоў. Па словах Аляксея Пятровіча, яму трапілася некалькі шчупакоў па 3-4 кг, але не менш за 20 з іх (самыя смачныя) – ад 800 грамаў да кілаграма. Пра сваю рыбалку паэт напісаў верш:

І ў мароз рыбак не «спіць»:
На здабытых ім жыўцоў
Ён над лункамі сядзіць,
Ловіць хіжных шчупакоў.  
А каму надта шанцуе,
Пападаюць «апараты».
Але ж  жонка не зазлуе,
Як прынёс «ножыкі» ў хату.
Добра іх сабе падсмажыць,
Ды й кансерваў нарабіць.
Праўду людзі здаўна кажуць:
«Не лянуйся – будзеш жыць».

Журналіст “ГЧ” завітаў у госці да Аляксея Пятровіча, калі той упраўляўся з уловам. Зрабіўшы фотасесію Пятровіча са шчупакамі, пагутарылі з ім і пра тэмы, якія зараз хвалююць рыбакоў. Вось якія меркаванні выказаў Аляксей Галаскок наконт гэтага: «Спрэчкі пра платную рыбалку амаль сціхлі. Многія прыйшлі да высновы, што так зручней. Не трэба біць машыны па калдобінах і потым яшчэ доўга ісці па лёдзе. Добра і тое, што прыслухалася кіраўніцтва рыбгаса да маёй прапановы прадаваць жыўцоў. Але засталіся пытанні наконт ільгот. Пазнаёмце, калі ласка, сваіх чытачоў з ветэранам Айчыннай вайны, які зімой ловіць задарма рыбу на вадасховішчы. Хочацца пабачыць, хто яму свідруе лункі, ставіць стаўкі і выцягвае рыбу. На маю думку, ільготы трэба зрабіць для ветэранаў працы, ветэранаў-вайскоўцаў. Прапаную, каб яны плацілі менш.

Незразумела яшчэ, каго лічыць мясцовымі жыхарамі? Я, напрыклад, ажаніўся ў Начы, аб чым сведчыць запіс у маім пашпарце. Летам жыву там і часта хаджу лавіць вудамі рыбу. Ці  мясцовыя жыхары Мельнікоў, Вострава? Браць ім з сабою пасведчанні, якія і паказваць спачатку рыбе, а потым ахоўнікам? Мне здаецца, маркетынгу рыбгаса трэба думаць і пра лета. Добра было б, каб была магчымасць зрабіць заказ і купіць рыбу. Лепей, каб рачную. Радаваліся б жанкі сваім здольным рыбакам. Яны ўжо выганялі б іх па рыбу! Не кепска было б, каб былі пляцоўкі для машын, дзе стаялі б мангалы з дровамі. Нават рыба бярэ весялей, калі падкормлена. Можа, і рыбакоў будзе болей. Праўда, ці захоча нехта гэтым займацца? Я прапаную чытачам газеты “ГЧ” дасылаць прапановы ў газету, а рэдакцыя іх перадасць кіраўніцтву рыбгаса».

Пакуль Аляксей Пятровіч чысціў налоўленую рыбу і рыхтаваўся наш нумар, адміністрацыя рыбгаса на звароты і прапановы рыбакоў ужо адрэагавала. Быў перагледжаны і зменшаны кошт месячнага абанемента для ажыццяўлення платнай рыбалкі. Замест ранейшых 750-ці цана зараз складае 350 тысяч рублёў, для ільготнай катэгорыі грамадзян (інвалідаў, асоб да 16 гадоў, пенсіянераў па ўзросце) – 250 тысяч рублёў. Не толькі ветэранам-вайскоўцам і ветэранам працы, але і пенсіянерам па ўзросце зроблена скідка – кошт разавай пуцёўкі складае для іх не 35, як раней, а 20 тысяч рублёў.