Перамога ФК «Ганцавічы-Сузор’е» можа абярнуцца паражэннем

Некалькі соцен балельшчыкаў, якія сабраліся на стадыёне ў Ганцавічах пасля доўгага перапынку паміж турамі, убачылі захапляльную, напружаную і цікавую гульню. На полі былі фаварыты Усходняй зоны чэмпіянату вобласці, дзве мацнейшыя каманды, якія да гэтай гульні займалі першы і другі радок турнірнай табліцы, маючы роўную колькасць ачкоў. 

Практычна роўныя па сілах каманды не раз прымушалі хвалявацца аматараў футбола. Не пашанцавала ў гэтай сустрэчы нашаму паўабаронцу Вадзіму Пабудзею: у першым тайме ён выходзіў сам-насам з варатаром, але не здолеў забіць з выгаднага становішча, у другім – яго моцны ўдар строс перакладзіну. Напрыканцы першага тайма не рэалізаваў пенальці і адзін з самых вопытных ігракоў ФК «Ганцавічы-Сузор’е» Аляксандр Ждановіч. Момантаў для рэалізацыі атак было нямала, але не раз выратоўваў гасцей галкіпер пінчан.

Толькі ў другім тайме, калі ў гасцей выдалілі аднаго іграка за неспартыўныя паводзіны, на трыбунах пачулі радасны вокліч “го-о-ол!”. Паказаўшы цудоўны дрыблінг, Ігар Бобка перакінуў варатара і на 79-й хвіліне сустрэчы адкрыў лік. А за чатыры хвіліны да заканчэння асноўнага часу матча поспех замацаваў яго калега па камандзе Аляксандр Ждановіч.

Накал у паядынку быў адзначаны і колькасцю папярэджанняў. Пяць жоўтых і адну чырвоную карткі паказаў галоўны рэферы матча А. Сладзінскі, з іх адну Аляксандру Клімовічу з ФК «Ганцавічы-Сузор’е», астатнія атрымалі футбалісты “КлюФа” (Клуба аматараў футбола) з Пінскага раёна.

Аднак вынік не задаволіў галоўнага трэнера гасцей Уладзіміра Косача, які выказаў нямала папрокаў, як у адрас судзейскай брыгады з Баранавіч, так і тым, што ў нашай камандзе на полі быў Ігар Бобка, які гуляе яшчэ ў слуцкай камандзе ў 1-й лізе чэмпіянату Беларусі.

Пасля сустрэчы госці падалі пратэст на вынік гульні. Аб гэтым “ГЧ” паведаміў галоўны трэнер каманды “КЛюФ” Уладзімір Косач.

“Што гэта за футбол такі? У турніры павінны ўдзельнічаць толькі аматары, а за Ганцавічы гуляюць прафесіяналы – гэта не па правілах. У палажэнні аб чэмпіянаце Брэсцкай вобласці па футболе чорным па беламу напісана, што ўдзел ігракоў з першай і вышэйшай лігі не дапускаецца! Правілы павінны быць для ўсіх аднолькавыя! – сказаў Уладзімір Мікалаевіч. – Калі абласная федэрацыя прыме рашэнне, якое супярэчыць палажэнню, то я буду звяртацца ў вышэйстаячую інстанцыю!”

Начальнік каманды ФК «Ганцавічы-Сузор’е» Анатоль Гнацюк на пытанне “ГЧ”, як склалася, што ў камандзе гуляюць ігракі з 1-й лігі, адказаў, што пытанне было яшчэ перад пачаткам чэмпіянату ўзгоднена на ўзроўні федэрацыі футбола Брэсцкай вобласці. “Гуляем пасля перапынку першы сезон і, каб паказаць добры ўзровень, стварыць касцяк каманды, мы звярталіся з такой просьбай да кіраўніцтва федэрацыі. У мяне на кожнага іграка ёсць картачкі, яны заяўляюцца ў матчах, і прэтэнзіі трэнера каманды “КлюФ” я лічу неабаснаванымі”, – сказаў А. Гнацюк.

У Брэсцкай абласной федэрацыі футбола падцвердзілі, што пратэст прыйшоў. Па словах галоўнага суддзі чэмпіянату вобласці Юрыя Рымчонка, разгляд пратэсту адбудзецца ў верасні.

Для гэтага камандзе “КЛюФ” трэба заплаціць 500 тысяч рублёў, аднак іх вернуць, калі пратэст будзе задаволены.

Калі гэта здарыцца, то ФК «Ганцавічы-Сузор’е» апусціцца з лідыруючых пазіцый, клубу будзе залічана паражэнне. Аднак да рашэння трэба пачакаць. І аб ім чытачам “ГЧ” мы абавязкова паведамім.