Кандыдаты ў прэзідэнты паказалі свае даходы

 

Даход старшыні Ліберальна-дэмакратычнай партыі (ЛДП) Сяргея Гайдукевіча склаў 263 млн 158 тыс. 324 рублі. Гэта даходы ад заработнай платы, пенсіі, ад продажу аўтамабіля, а таксама даход, атрыманы з-за мяжы, і штомесячнае грашовае ўтрыманне. Ва ўласнасці Гайдукевіча знаходзяцца два легкавыя аўтамабілі: Nissan X-Trail 2014 года выпуску і BMW 730 1996 года выпуску.

Даходы яго жонкі Алы Гайдукевіч ад заработнай платы і ад здачы ў арэнду маёмасці склалі 238 млн 260 тыс. 448 рублёў. У яе ўласнасці знаходзяцца: жылы дом у вёсцы Сёмкава Мінскага раёна агульнай плошчай 155 м кв.; зямельны ўчастак у вёсцы Сёмкава Мінскага раёна плошчай 0,25 га; аднапакаёвая кватэра ў Мінску агульнай плошчай 30 м кв.; аднапакаёвая кватэра ў Мінску агульнай плошчай 25 м кв.; двухпакаёвая кватэра ў Мінску агульнай плошчай 35 м кв. Таксама яна мае легкавы аўтамабіль Renault-Duster 2013 года выпуску.

 

Даходы актывісткі кампаніі «Гавары праўду» Таццяны Караткевіч у 2014 годзе склалі 60 млн 86 тыс. 98 рублёў. Гэта даходы ад заработнай платы і даходы, атрыманыя па дагаворы дарэння. Нерухомай маёмасці і транспартных сродкаў у яе ўласнасці няма.

Даходы яе мужа Віталя Караткевіча склалі 40 млн 47 тыс. 237 рублёў. У яго ва ўласнасці знаходзяцца легкавыя аўтамабілі Ford Scorpio 1988 года выпуску і Honda Accord 1998 года выпуску. Даходы маці Т. Караткевіч – Наталлі Халецкай – склалі 108 млн 536 тысяч 6 рублёў, у яе ўласнасці знаходзіцца кватэра ў Мінску агульнай плошчай 62 м кв.

Даход дзейнага прэзідэнта Аляксандра Лукашэнкі ў 2014 годзе ад заработнай платы склаў 551 млн 761 тыс. 258 рублёў. Іншыя даходы і ўласнасць у яго, паводле дэкларацыі, адсутнічаюць.

Даходы жонкі дзейнага прэзідэнта Галіны Лукашэнкі ад заработнай платы, пенсіі і дывідэндаў склалі ў 2014 годзе 98 млн 223 тыс. 332 рублі. У яе ўласнасці знаходзяцца: жылы дом у Шклове Магілёўскай вобласці агульнай плошчай 115 м кв.; доля ў праве ўласнасці на жылы дом у вёсцы Вялікі Межнік Шклоўскага раёна Магілёўскай вобласці агульнай плошчай 53 м кв.; 56 акцый ААТ «Шклоўскі масларобны завод».

Даходы старшыні Беларускай патрыятычнай партыі, вярхоўнага атамана РГА «Беларускае казацтва» Мікалая Улаховіча ў 2014 годзе ад заработнай платы і пенсіі склалі 243 млн 502 тыс. 475 рублёў. У яго ўласнасці знаходзяцца: жылы дом у вёсцы Яцкаўшчына Ляхавіцкага раёна Брэсцкай вобласці агульнай плошчай 82 м кв.; зямельны ўчастак у вёсцы Яцкаўшчына Ляхавіцкага раёна Брэсцкай вобласці плошчай 0,25 га; жылы дом у вёсцы Млын Чашніцкага раёна Віцебскай вобласці агульнай плошчай 45 м кв.; 240 тысяч акцый ААТ «Парытэтбанк».

Даходы яго жонкі Раісы Улаховіч ад заработнай платы і пенсіі склалі 235 млн 323 тыс. 678 рублёў. У яе ўласнасці знаходзіцца: кватэра ў Мінску агульнай плошчай 148 м кв.; гараж-бокс у Мінску плошчай 24 м кв.; адміністрацыйна-гандлёвае памяшканне ў Мінску плошчай 64 м кв. (доля – 99/100); адміністрацыйнае памяшканне ў Мінску плошчай 34 м кв. (доля – 99/100); гандлёвае памяшканне ў Мінску плошчай 16 м кв. (доля – 99/100); гандлёвае памяшканне ў раёне вёскі Азярцо Мінскага раёна плошчай 10 м кв.