Прапанову Міністэрства энергетыкі Беларусі раздзялаўцы забракавалі

Вяскоўцы, якіх у зале Раздзялавіцкага Дома культуры сабралася 86 чалавек, яшчэ да пачатку сходу былі эмацыйна і рашуча настроены супраць і літаральна з першых хвілін выступлення перабівалі прадстаўніка газавай службы, які спрабаваў данесці інфармацыю да іх.

Як патлумачыў вядучы інжынер філіяла «Ганцавіцкі раён газазабеспячэння» УП «Баранавічырайгаз» Рыгор Іванцоў, людзям прапануецца перавесці пяці-павярховыя дамы на электрапліты, а астатніх, хто карыстаецца газам з рэзервуараў, на газабалонныя ўстаноўкі.

«Гэта не наша ініцыятыва, мы і самі не вельмі гарым жаданнем праводзіць такія работы, – разважліва спрабаваў тлумачыць Рыгор Паўлавіч, хоць пад зычныя галасы пратэстуючых раздзялаўцаў рабіць гэта было няпроста. – Нам прыйшло пісьмо, каб гэтую прапанову мы вынеслі на абмеркаванне і даведаліся, як адносяцца людзі…»

Але дагаварыць прадстаўнік газавай службы не змог – раздзялаўцы патрабавалі паказаць пісьмо, яго нумар і подпіс, хто яго даслаў. Адзін з жыхароў, зразумеўшы, што пісьма ў іх з сабой няма, дэманстратыўна пакінуў залу, кінуўшы: «То ў такім разе і гаварыць тут няма пра што».
Старшыня сельсавета Генадзь Перашчук усё ж змог заклікаць людзей да парадку, але эмоцыі вяскоўцаў пераважвалі, іншы раз выступоўцы падымаліся і гаварылі адразу ўдваіх. Але было відавочным адзінства ў іншым – практычна ўсе раздзялаўцы, зразумеўшы сутнасць прапановы, выказвалі нязгоду.

Здагадкі некаторых вяскоўцаў, што такім чынам філіял «Ганцавіцкі раён газазабеспячэння УП «Баранавічырайгаз» спрабуе збавіцца ад нявыгадных паслуг, Рыгор Іванцоў абверг.

Сапраўдную прычыну пераходу з газазабеспячэння на электраэнергію агучыў начальнік Ганцавіцкіх электрасетак філіяла «Баранавіцкія электрасеткі» РУП «Брэстэнерга» Ігар Букса.

Па словах Ігара Сцяпанавіча, звязана гэта з будаўніцтвам АЭС у Астраўцы: пасля ўводу у эксплуатацыю трэба нейкім чынам размяркоўваць яе вытворчыя магутнасці. У сувязі з прадстаячым уводам у эксплуатацыю АЭС разглядаецца і пытанне аб згортванні праграмы газіфікацыі сельскіх населеных пунктаў.

Як вы-светлілася, пытанне тычыцца не толькі жыхароў больш чым сарака дамоў з Раздзялавіч (вуліцы Міра, Савецкай, Дружбы, Кастрычніцкай), але і жыльцоў двухпавярховых дамоў у вёсках Вялікія Круговічы і Дзяніскавічы, якія карыстаюцца прывазным газам з рэзервуараў.

Нягледзячы на тое, што ўсе расходы па пераабсталяванні газавых пліт на электрычныя будзе праводзіцца не за кошт жыльцоў, вяскоўцы былі незадаволены і наперабой выказвалі аргументы, што гэта ўсё роўна павялічыць іх расходы. А тое, за чый кошт будзе праводзіцца пераабсталяванне на балонныя ўстаноўкі, увогуле не агучвалася.

Каб замяніць газавыя пліты на электра-пліты, патрэбны тэхнічныя ўмовы, якія падрыхтуе ЖКГ. Неабходна замяніць усю электраправодку і шчыткі, заплаціць за праектную дакументацыю, закупіць электрапліты – а гэта патрабуе каласальных выдаткаў.

Прагматычныя раздзялаўцы ўжо падлічылі, што газ для іх значна танней, чым электраэнергія. Бо амаль усе трымаюць хатнюю жывёлу, а тарыфы на электраэнергію такія, што львіная доля зарплат і пенсій пойдзе на аплату энергазабеспячэння.

«Раней нам заяўлялі, што для ўсіх аграгарадкоў Ганцаўшчыны распрацавана праграма газіфікацыі, называлі тэрміны, калі прыродны газ будзе праведзены ў Хатынічы, Раздзялавічы. Час мінуў, а нічога гэтага няма. Зараз нас хочуць прымусіць пераходзіць на электрапліты!» – сказала Надзея Рабцэвіч. Яе падтрымалі і астатнія вяскоўцы. «А хто купіць нашыя газавыя пліты, амаль новыя, якія вы прымусілі замяніць, бо быццам бы яны ўжо свой тэрмін адпрацавалі?!» – чуўся голас з задніх радоў.

Нягледзячы на шум і крыкі, некаторыя жыхары ўсё ж сачылі, каб сход не ператвараўся ў балаган, а меў канструктыўны зыход. Уладзімір Цыброў прапанаваў паставіць пытанне на галасаванне.

Амаль усе вяскоўцы паднялі рукі, што супраць пераходу на электрычныя пліты і хочуць пакінуць усё як ёсць. А калі ёсць неабходнасць чысткі газавых рэзервуараў, то аб фінансаванні можна пагутарыць асобна.

Па выніках агульнага сходу Хатыніцкі сельвыканкам павінен падрыхтаваць для Міністэрства энергетыкі Рэспублікі Беларусь адказ і агучыць грамадскую думку жыхароў в. Раздзялавічы. А раздзялаўцы сказалі «НЕ!»