“Адукацыя” спявала і танцавала, “культура” – ставіла ацэнкі

“Якая прыгажосць! Колькі ў нас творча адораных людзей!” – захапляліся прысутныя ўбачаным на выставе, якая запрацавала перад самім конкурсам у фае гімназіі. Сапраўды, чаго тут толькі не было! Вышыўка, вязанне кручком, выцінанка, валянне, дэкупаж, бісерапляценне, квілінг… Здавалася, любыя віды і тэхнікі рукадзелля падуладны спраўным рукам настаўніцкай браціі.

Аднак гэта, як аказалася, былі “кветачкі”. А “ягадкі” чакалі праз кольвечы часу ў актавай зале: работнікі адукацыі раптам пераўтварыліся ў сапраўдных артыстаў. “Зоркі”? Да ну! Зоркі далёкія і халодныя. А тут былі звычайныя людзі – блізкія, шчырыя, адкрытыя, якія дарылі сваім гледачам цеплыню праз свае песні, танцы, сцэнкі, вершы…

Пэўна, не ўсё атрымалася найлепшым чынам. Так, зацягнутым для такой формы мерапрыемства стала падарожжа ў мінулае Ганцавічаў, і людзі ў зале не хавалі сваёй незацікаўленасці. Некаторыя нумары, адчувалася, былі злеплены на хуткую руку. Аднак не будзем нікога судзіць строга: гонар сваёй установы, як умелі, стараліся абараніць усе самадзейныя артысты, і з гэтай задачай яны справіліся.

Стараюся выцягнуць з памяці нумары, якія найбольш уразілі. Ці не адкрыццём для мяне стала выступленне работніцы Раздзялавіцкага ясляў-сада Надзеі Матусевіч, якая на памяць прачытала паэму “Рэквіем” Ганны Ахматавай. Мініяцюры “Жанчына і яе розум” (Надзея Савеня і Надзея Пашкевіч, гімназія) і “Плёткі” (Эльвіра Бобка і Надзея Кабрынец з Малькавіцкай СШ), урывак з паэмы Я. Коласа “Новая зямля” (Аляксандр Макаед з Кукаўскай СШ) спадабаліся і гледачам, што адчувалася па іх цёплым прыёме. Гучалі тут і ўласныя вершы ў выкананні саміх аўтараў: Наталлі Рубанавай з Чудзінскага ясляў-сада № 16, Наталлі Шыдлоўскай (яслі-сад № 1 г. Ганцавічы).

Паказалі работнікі адукацыі і свае вакальныя даныя. Песню “Вёсачка” выканала Таццяна Пабудзей з Востраўскага ясляў-сада – сярэдняй школы, “За сінімі туманамі” – Аксана Зялёнка з гімназіі, “Села птаха на таполю” – Ала Вадзюціна з дзіцячага ясляў-сада № 2 г. Ганцавічы, “Я деревенская” – Надзея Берташ з Дзяніскавіцкага ясляў-сада, “Памолімся за бацькоў” – Эльвіра Бобка з Малькавіцкай СШ, “Калыханка маме” – Алена Бухал са спецыялізаванай дапаможнай школы-інтэрната, “Затрымай мяне” – Наталля Задружная з гімназіі… Не маглі не запомніцца гледачу песні ў выкананні мам са сваімі дачушкамі – Таццяны і Лізаветы Шахрай (яслі-сад № 1 г. Ганцавічы), Святланы і Ульяны Муха (СШ № 3).

Шкада, што мала было на сцэне, як, дарэчы, і ўвогуле ў адукацыі, мужчын. Раман Сімановіч (Раздзялавіцкая СШ), Уладзімір Савончык і Аляксандр Занька (Люсінскі дзіцячы сад – сярэдняя школа), Віктар Супрун, Віталь і Аляксандр Макаеды (Кукаўская СШ)… Штосьці больш і не згадваюцца імёны самадзейных артыстаў-мужчын.

Заўжды прыемна паглядзець на выступленні калектываў. Так, выклікаў добры смех музычны танец “Яблычка” ў выкананні работнікаў ясляў-сада № 1. Дружныя ўсмешкі і воклікі падтрымкі пачулі ў свой адрас кукаўскія настаўнікі – ансамбль “Дубравушка”, асабліва за жартоўную тэатралізаваную песню “Лісапед”. Адчувалася спетасць артыстаў гэтага ансамбля, чаго некаторым іншым калектывам якраз неставала. Яркімі касцюмамі і ўдалай пастаноўкай танца парадавалі настаўнікі СШ № 3, якія выканалі “Маскоўскую кадрыль”. Спадабаліся гледачам таксама песні вакальных груп “Забава” (яслі-сад №2 г. Ганцавічы), “Вясёлка” (яслі-сад № 4 г. Ганцавічы), сцэнка “Камп’ютарны магазін” (Люсінскі дзіцячы сад – сярэдняя школа).

А раённы Цэнтр дзіцячай і юнацкай творчасці паказаў цэлую праграму з народнымі сцэнкамі, гумарам і песнямі, з дапамогай якой гледачы пабывалі на беларускім кірмашы. “Чаму ж мне не пець, чаму ж не гудзець, калі ў маёй хатачцы парадак ідзець…” – дружна спявалі артысты РЦДЮТ напрыканцы свайго яскравага выступлення, якім яны, між іншым, якраз пачыналі праграму конкурсу.

– На сайце аддзела адукацыі, спорту і турызму райвыканкама абяцаюць зорны дождж.
– Дождж?
– Так, зорны дождж, – жартавалі вядучыя праграмы Люсінскага дзіцячага сада – сярэдняй школы Аляксандр Занька і Людміла Амбражук.

Не ведаю, як “зорны”, а “талентавы” дождж у гэты дзень у Ганцавічах сапраўды праліўся, і доўжыўся ён каля пяці гадзін. Журы дасталася нялёгкая задача: вызначыць, хто з работнікаў адукацыі аздобіць фінальны канцэрт раённага конкурсу, які пройдзе ў маі.