З каго будзем выбіраць? І хто будзе лічыць?

Па Баранавіцкай сельскай выбарчай акрузе № 7, куды ўваходзіць г. Ганцавічы і пяць сельсаветаў акрамя Хатыніцкага, Люсінскага і Малькавіцкага, зарэгістравана ініцыятыўная група грамадзян па вылучэнню кандыдата ў дэпутаты шляхам збору подпісаў Мікалая Мефодз’евіча Язубца, які зараз займае пасаду старшыні Баранавіцкага райвыканкама. 

А вось па Лунінецкай выбарчай акрузе №13 шляхам збору подпісаў вылучыліся ўжо два прадстаўнікі – Валянціна Ігнацьеўна Верас (загадчык аадзела адукацыі Лунінецкага райвыканкама) і Віталь Мікалаевіч Каратыш (эканаміст).

Дарэчы Віталь Каратыш, уражэнец Кажан-Гарадка Лунінецкага раёна, балатаваўся ў парламент на мінулых выбарах, але пад час выбарчай кампаніі яго тэрмінова забралі ў войска. Зараз ён робіць чарговую спробу стаць прадстаўніком народа ў заканадаўчым органе.

Спіс прэтэндэнтаў у кандыдаты на дэпутацкі мандат можа яшчэ папоўніцца. Да 13 жніўня вылучыць сваіх прадстаўнікоў могуць палітычныя партыі, грамадскія аб’яднанні і працоўныя калектывы.

Але наперадзе яшчэ этап регістрацыі. І можа стацца, што няўгодных кандыдатаў могуць не зарэгістраваць, як ужо не раз бывала. І тады пройдуць безальтэрнатыўныя, спакойныя і чэсныя выбары.

Уключыцца ў выбарчы працэс могуць і жыхары Ганцаўшчыны. І калі не ставіць мэтай трапіць у дэпутатскае крэсла, то паўдзельнічаць у якасці члена ўчастковых выбарчых камісій. Для гэтага патрэбна сабраць не менш як 10 подпісаў грамадзян з выбарчага ўчастка і падаць заяву аб уключэнні ва ўчастковую выбарчую камісіію ў райвыканкам да 5 жніўня ўключна. Будзе магчымасць сваімі вачыма паглядзець, як праходзяць выбары знутры, ды і грошы за працу ў выбарчай камісіі не пашкодзяць. А праца там зусім нескладаная: выдаваць бюллетэні і лічыць галасы пад сілу любому.
Пытанні, якія тычацца выбараў, можна задаць: Баранавіцкая сельская выбарчая акруга №7, тэл. 8(01634) 2 47 41. Месца размяшчэння камісіі: г.Баранавічы, вул.Савецкая, 79, каб.602.

Лунінецкая выбарчая акруга №13. Месца размяшчэння камісіі: г.Лунінец, вул.Чырвоная, 1, каб.203

Тэлефон 8(01647) 2 24 52, 8(01647) 2 21 84