У Ганцавіцкім раёне знікне яшчэ адзін калгас

Пасля антырэкордаў у паказчыках па надоях малака і раслінаводства, якіх дасягнуў СВК “Агра-Нач” за апошнія гады, работнікі сельгаскааператыва вырашылі аддаць права кіравання аднаму з лепшых кіраўнікоў сельскагаспадарчых прадпрыемстваў Уладзіміру Грыгарану, які зараз узначальвае СВК “Дубнякі”. Гэтая гаспадарка трымае трэцяе месца ў краіне па надоях малака і займае лідыруючыя пазіцыі па многіх паказчыках сельгасвытворчасці ў раёне і вобласці.

У гэтым годзе планаў аб рэарганізацыі шляхам узбуйнення калгасаў акрамя аб’яднання СВК “Бярозавец” (в. Ганцавічы) і СВК “Малькавічы” больш не было. З ініцыятывай аб аб’яднанні калгасаў выступіў старшыня райвыканкама Аляксандр Саланевіч. Па яго словах, тэрміны, якія кіраўніцтва СВК “Агра-Нач” прасіла на выпраўленне сітуацыі, сышлі, і таму няма сэнсу больш чакаць, каб на самых лепшых землях, а некалі калгас “Праўда” быў адным з лідараў, гаспадарка прыйшла яшчэ ў большы заняпад.

У СВК “Агра-Нач” пагалоўе жывёлы зменшылася за пяць гадоў на 500 галоў, самая нізкая ўраджайнасць зерневых культур была ў раёне за мінулы год, надоі малака самыя меншыя ў краіне за мінулы год – каля 2 тон на карову. “Прагрымелі” мы на ўсю рэспубліку і з недастачай жывёлы (недзе знікла 185 галоў буйна-рагатай жывёлы на суму больш за 400 млн рублёў – заўв. Аўтара), – сказаў Аляксандр Саланевіч. – Яшчэ год, можа, будзе доўжыцца праверка. І невядома чым закончыцца. Нехта за гэту жывёлу грошы атрымоўваў, камбікорм спісваў”. Па словах старшыні райвыканкама, спачатку кіраўнік СВК “Дубнякі” Уладзімір Грыгаран быў супраць аб’яднання, але пасля пераканання яшчэ і старшыні аблвыканкама Уладзіміра Сумара ён здаўся.

Было зразумела, чаму не хацеў Ваганавіч браць на сябе такі груз.

Здзівіла іншае, што калгаснікі СВК “Агра-Нач” спачатку яўна не хацелі далучэння ці ўвогуле ім была лянота паднімаць рукі. Калі выконваючы абавязкі старшыні СВК “Агра-Нач”, Сяргей Аляксейчык першы раз паставіў пытанне на галасаванне, то толькі ён сам прагаласаваў за аб’яднанне. Народ захацеў выслухаць Уладзіміра Грыгарана. “Дык скажыце, што вы нам паабяцаеце і што будзе пасля гэтага аб’яднання”, – сказала самая актыўная ўдзельніца сходу цялятніца Валянціна Лідская.

“Вам горш не будзе, будзе горш толькі мне, бо прыйдзецца ўжо і начаваць тут, – сказаў Уладзімір Грыгаран. – Крыўдна мне, як былому суседу па гаспадарках, што прыходзіцца працягваць руку дапамогі і зараз паднімаць некалі адзін з самых славутых калгасаў Ганцаўшчыны. Кіраўнікі папярэднія ўпусцілі, не замацоўвалі тэхнічную базу, не будавалі, вось і дажыліся, што самай адсталай гаспадаркай сталі. А на чорта кіраўнік, які не вырашае праблемы, не клапоціцца пра людзей, якія хочуць прыстойна зарабляць за сваю працу? Грош цана такому кіраўніку”.

Як выступоўца, Уладзімір Ваганавіч выдатны аратар, і сваёй харызматычнай натурай прыцягвае і зараджае на добры лад. Яго аргументы зацікавілі людзей. Па яго словах, у яго гаспадарцы зараз камбайнеры зарабляюць па 400-500 тысяч рублёў у дзень. Сярэднямесячная зарплата за паўгода 1 млн 860 тысяч рублёў, а СВК “Агра-Начы – 904 тысячы рублёў.
Многа Уладзімір Ваганавіч абяцаў і для работнікаў, і для вяскоўцаў: механізаваць пасадку бульбы, дапамагаць сенам, збожжам і транспартам для прывозу дроў. Таму пасля яго выступу ўсе за аб’яднанне прагаласавалі адзінагалосна.

Старшыня райвыканкама А. Саланевіч таксама намаляваў перспектывы, што калі ўдасца трапіць у праграму авечкагадоўлі, то на базе гаспадаркі “Агра-Нач” адновяць гэтую галіну, і ў раёне будзе створана пераапрацоўка воўны. А вёска Лактышы стане агратурыстычным цэнтрам для рыбакоў і амаратаў прыроды.

“Але не думайце, што прагаласавалі і можна сядзець, і зараз гарачая пара, калі дзень год корміць, і сядзець у зале няма калі. Будзеце працаваць – будзе вынік, будзе зарплата”, – сказаў старшыня райвыканкама.

Вось толькі СВК “Агра- Начы”, як і калгаса “Праўда”, ужо не будзе.