Касцёлу Рымска-каталіцкай парафіі ў горадзе Ганцавічы – 15 год

Каталіцкія вернікі сабраліся ў касцёле яшчэ за гадзіну да ўрачыстай імшы, каб паўдзельнічаць у адарацыі і ўсім разам адгаварыць ружанцовую малітву да Маці Божай. У 12 гадзін касцельныя званы голасна абвясцілі пачатак святой імшы.

Да алтара выйшаў ксёндз біскуп Антоній Дзям’янка. Шаноўнага госця віталі ад імя ўсіх прыхаджан Наталля і Сяргей Бобка з дзецьмі Арцёмам і Ільёй. Галоўны святар Пінскай дыяцэзіі абвясціў, што гэты святочны дзень спалучыў дзве ўрачыстасці: юбілей касцёла і прыняцце прысягі на служэнне ў Ганцавіцкай парафіі новапрызначанага святара – ксяндза дэкана Андрэя Шоды. Ён патлумачыў, што, акрамя выканання абавязкаў пробашча (настаяцеля) касцёла ў Ганцавічах, ксёндз Андрэй будзе ўзначальваць Ляхавіцкі дэканат і кіраваць супольнай дзейнасцю некалькіх касцёлаў. З прыхільнасцю і шчырым хваляваннем успрынялі вернікі прысягу ксяндза, пільна ўслухоўваліся ў словы малітваў, якія ён прамаўляў падчас прысягі.

Чароўныя гукі аргана, светлыя малітвы да Бога і песнапенні на працягу ўсёй імшы ўзляталі пад купал касцёла.

Ксёндз біскуп падчас пропаведзі нагадаў прыхаджанам пра складаныя часы для парафіі, а таксама пра будову касцёла і ксяндза Юзэфа Войду, стараннямі і шчырым служэннем якога была адноўлена каталіцкая парафія ў Ганцавічах і пабудаваны гэты храм, падзякаваў прыхаджанам за актыўнае жыццё пры касцёле і за супольныя малітвы. Асаблівую падзяку ён выказаў тым, “хто найбольш спрычыніўся да таго, каб касцёл жыў і дзейнічаў”.

Напрыканцы святой імшы перад прыхаджанамі і святарамі выступіў старшыня райвыканкама А.П. Саланевіч. Ён павіншаваў прыхаджан са святам, адзначыў важную ролю касцёла ў духоўным выхаванні грамадства і выказаў надзею, што новапрызначаны святар і ўсе прыхаджане касцёла будуць жыць і дзейнічаць па справядлівых Божых законах. Кіраўнік раённай улады уручыў касцёлу каштоўны падарунак – прыгожы дыван, які быў засланы перад алтаром.

К.І. Іруць і М.К. Заляценка ад імя ўсіх парафіянаў выступілі са словамі падзякі Пану Богу Усемагутнаму, святой памяці Кардыналу Казіміру Свёнтку, які 15 год таму асвяціў касцёл, усім святарам, якія спрычыніліся да пабудовы касцёла ў Ганцавічах, асаблівым чынам ксяндзу Юзэфу Войдзе. Прачулыя словы пашаны і ўдзячнасці былі звернуты да старэйшых парафіянаў, якія калісьці распачалі справу аднаўлення парафіі. Дружнымі воплескамі выразілі парафіяне сваю ўдзячнасць і старэйшай прыхаджанцы касцёла Алене Бондар, якая была першай старшынёй касцельнага камітэта і галоўнай памочніцай ксяндза Юзэфа ў справе будаўніцтва касцёла.

Асобную падзяку парафіяне выказалі раённай уладзе за памяркоўныя адносіны да католікаў і разуменне ролі рэлігіі ў духоўным станаўленні грамадзян краіны.

Благаслаўляючы Ганцавіцкую парафію на далейшыя гады жыцця, ксёндз біскуп Антоній Дзям’янка пажадаў вернікам заўсёды імкнуцца да Бога, спадзявацца на Яго і любіць Яго, берагчы свой касцёл і маліцца за тое, каб сярод моладзі былі пакліканні да святарскага служэння.