На “Калядным кірмашы” ўсім знайшліся заняткі для душы

Як сказала адна з арганізатараў выставы-кірмашу дырэктар раённага Дома рамёстваў Маргарыта Саланевіч, такое мерапрыемства ў горадзе праводзіцца ўпершыню.

Маргарыта Аляксандраўна патлумачыла, што кірмаш адбыўся напярэдадні навагодніх святаў, каб наведвальнікі выставы сумясцілі карыснае з прыемным і не толькі пазнаёміліся з ганцавіцкімі майстрамі ды  ўбачылі  ўнікальныя прадметы ручной працы, але і набылі для дарагіх сэрцу людзей арыгінальныя падарункі да Новага года і Калядаў.

Кірмаш пазнаёміў з рукадзельнікамі

Каля дваццаці ганцавіцкіх рукадзельніц і майстроў з вялікай ахвотай прынялі ўдзел у выставе-кірмашы.

Так, у холе кінатэатра свае вырабы дэманстравала Наталля Шуляк з в. Дзяніскавічы, якая робіць цацкі з мешкавіны і тканіны (лялькі, лесавічкі, хатнікі), ёлкі з шышак, кошыкі з дроту і шмат іншага. “Ідэй шмат, рук не хапае,  – пажартавала майстрыца. – Калі майструю, адпачываю, бо гэта хутчэй праца для душы,  прыбытку ад яе не так ужо і многа”.

Вырабы з джутавай ніткі і фетру прадставіла кіраўнік кружка СШ №2 “Рукадзельніца” Лілія Кудравец, а выхавальніца гарадскога дзіцячага садка №2 Ларыса Васільеўна таксама працуе над фетравымі ўпрыгожаннямі для ёлку.

Выхавальніца з ганцавіцкага прытулку Наталля Фартавая прынесла посуд, упрыгожаны кропачным роспісам.  Кіраўнік гуртка “Рукадзелле” з гімназіі Наталля Міхаевіч выставіла цацкі з тэкстылю, а лабарант кабінета інфарматыкі з гімназіі Вольга Швайка змайстравала ёлку з драўляных дошак (у скандынаўскім стылі).

Ганцаўчанка Вольга Заяц, якая знаходзіцца ў адпачынку па доглядзе дзіцяці да трох гадоў, робіць букеты з каляровай паперы, а таксама заколкі і абручы са стужак. “У мяне две дачушкі, хацелася, каб яны не былі падобныя на іншых дзяўчынак, вось і навучылася рабіць упрыгожанні. А потым хобі незаўважна неяк ператварылася ў прыбытак”, – сказала жанчына.

З РЦДЮТ на выставу прыйшлі некалькі майстроў: Наталля Дрозд – кіраўнік гуртка “Пляценне”, якая прынесла таксама  працы іншых гурткоўцаў, і Пупач Галіна.

Сямейны тандэм ганцаўчан Марыі Мухі, Вольгі Красно і Леаніда Краўчука, на кірмаш даставіў вышываныя вырабы і вязаныя кручком, а таксама шкатулкі з дрэва.

Пенсіянерка з горада Надзея Ціхан выставіла вышытыя карціны. Майстрыца з Дома народнай творчасці в. Ганцавічы Валянціны Занька прадставіла рэчы з саломкі, а Тамара Занька з Люсінскага сельскага клуба прывезла свае вырабы з газет.

Яшчэ дзве ганцаўчанкі – Анастасія Клявец і Таццяна Зялёнка – прынеслі на кірмаш упрыгожанні са стужак для жанчын і дзяўчат, а таксама ёлачныя цацкі з тэкстылю.

Ганцаўчанін Віктар Шэмет пляце кашы з лазы і шпагату. “Я ад бацькі навучыўся, а цяпер вось сам пляту ў вольны час. Але ў горадзе гэта рабіць цяжка,бо лазу на батарэі не вельмі высушыш. Калі ёсць печка, то кашы плесці  значна лягчэй”, – расказаў майстар.

Не абышлося на кірмашы без салодкіх прысмакаў: каляднае пячэнне, пірожныя і кексы як сапраўдныя вырабы мастацтва гарманічна ўпісваліся ў агульную выставачную атмасферу, а пах кавы вітаў у зале. Печыва на свята прыгатавалі майстрыцы з Дома рамёстваў.

Не толькі паглядзець ды прыцанніцца, а і зрабіць сваімі рукамі

Многія ганцаўчане адклікнуліся на запрашэнне арганізатараў і прыйшлі на калядны кірмаш. Для ўсіх жадаючых на свяце прайшлі майстар-класы.

Першы ўрок тычыўся упрыгожвання посуду кропачным роспісам, які правяла Наталля Фартавая, выхавальніца з дзіцячага прытулку. Навучэнцы спрабавалі кропкамі фарбы выводзіць малюнкі на талерках.

На другім уроку ўсе жадаючыя стваралі калядныя вянкі. Майстар-клас правяла Вольга Калдаева, настаўніца з СШ №3.

Гэты ўрок асабліва спадабаўся некаторым прысутным, бо ў выставачнай зале вітаў навагодні дух, ізюмінкай кожнага каляднага вянка быў мяшочак с соллю з піхтавым водарам.  “Як ў дзяцінства акунуліся, калі ў хаце пахне жывая ёлка. Так пахне свята, непаўторна і незабываема”, — сказала адна з удзельніц выставы Вольга Карпеня.

Негледзячы на тое, что рукі вучняў былі выпэцканы ў клей і смалу, самі ўдзельнікі былі задаволены справай сваіх рук. Настаўніца Вольга Калдаева адзначыла, што ўсе навучэнцы праявілі арыгінальнасцьі проста іскрылі ідэямі. “ Вы проста малайцы! Упершыню селі рабіць вянкі, і адразу добра атрымалася”, — сказала яна.

“Вучні превзошлі сваю настаўніцу”, — пажартаваў на гэта намеснік старшыні райвыканкама Сяргей Сарокаў, які таксама прыняў удзел у майстар-класе.

Лабарант з гімназіі Вольга Швайка прызналася, што даўно хацела паспрабаваць зрабіць калядны вянок, ды ўсё неяк не атрымлівалася. “Глядзела па тэлевізары майстар-клас, аднак усё не атрымалася паўтарыць,бо было не зразумела, як што рабіць. А тут ужывую паспрабавала, і атрымалася! Таму я вельмі задаволеная, што трапіла сюды, на майстар-клас”, — сказала жанчына.

Вучні майстар-класа забралі свае вырабы дамоў. А супрацоўніца ГДК паабяцала павесіць свой вянок на дзверах роднай установы. “Там яму самае месца. Я для таго і шчыравала”, – сказала яна.

На іншых майстар-классах ганцаўчане вучыліся рабіць калядную паштоўку з ёлкай ці пеўнікам (майстар Дома рамёстваў Вольга Івановіч, тэхніка “Выцінанка”), ляльку з тканіны – зайчыка на пальчык для немаўлят (майстар з в. Дзяніскавічы Наталля Швайка) і вырабы з саломы – званочкі і лапаткі  (вучыла дырэктар Дома народнай творчасці в. Ганцавічы Валянціна Занька).

Азартныя ганцаўчане гулялі ў латарэю і слухалі музыку

Вабіла дзяцей і дарослых бяспройгрышная латарэя, у якой  ганцаўчане выйгравалі дзіцячыя цацкі, побытавыя рэчы, канцылярскія вырабы, касметыку, салодкія прысмакі і іншае.

Музычнае аздабленне выставы было ў выкананні настаўнікаў і вучняў Дзіцячай школы мастацтва і барда Ягора Мухі.

Майстрам падказалі, як зарабляць на хобі

На калядным кірмашы можна было не толькі выбраць падарунак і павучыцца ў майстроў ці выпіць кавы, але і выслухаць карысныя парады, як стаць рамеснікам. Па словах Маргарыты Саланевіч, інфармацыю для гутаркі “Пяць парад, як стаць рамеснікам”, прадставіла падатковая інспекцыя па Ганцавіцкім раёне. “Шмат людзей падыходзіла – цікавіліся, і гэта зразумела: у раёне шмат таленавітых людзей, якія што-небудзь майструюць. Дык чаму б на гэтым не зарабляць?” – сказала Маргарыта Аляксандраўна.

На кірмашы майстры-рамеснікі падзяліліся вопытам і расказалі, як яны сталі зарабляць на сваім хобі.

Напрыклад, ганцаўчанка Марыя Муха сказала: “Трэба цаніць сябе, сваю працу. Хто дасць вам рубель, калі вы цэніце сябе менш за капейку?”.

Яшчэ яна прывяла словы Коко Шанэль пра рэчы, зробленыя сваімі рукамі: “Не кожны годны іх мець. А калі хто не можа заплаціць за іх, то хай зробіць сам…”

Дзеці акунуліся ў казачныя прыгоды на святочным шоу “У гасцях у ёлкі”

Да двара прыйшлася на кірмашы і навагодняя шоу-праграма для самых малых удзельнікаў, якую падрыхтавалі супрацоўнікі кінатэатра “Маладосць”.

Дзеці ў маскарадных касцюмах, сярод якіх былі вавёркі, лісы, прынцы і прынцэсы, сняжынкі, божая кароўка, хамячок, чалавек-павук і іншыя, сталі ўдзельнікамі навагодняга “дэтэктыву”.

Кікімара ўкрала мяшок з падарункамі ў Дзеда Мароза, але на ім вісеў вялізарны замок. Казачныя героі разам з малымі шукалі ключы ад яго падчас конкурсаў.

Інтрыга заключалася ў тым, што ніводзін ключ не падышоў да замка, і казачныя героі амаль не пабіліся, падазраваючы адзін другога ў падмане. Памірыў усіх Дзед Мароз са Снягуркай. Як аказалася, ключ быў у іх. Дзядуля адкрыў мяшок з падарункамі, разам з унучкай яны выслухалі вершыкі, якія расказвалідзеткі, і кожнаму з іх далі па цукерцы.

“Так цікава было! Я патузала Дзядулю Мароза за бараду, але ён не прыкмеціў. Мы з брацікам расказалі яму вершыкі, і ён даў нам цукерак. Дзед Мароз сапраўдны!” – сказала 5-гадовая Паліна.

Пасля была дыскатэка і розыгрыш падарункаў за лепшы маскарадны касцюм. Ніводнае дзіця не пайшло з мерапрыемства без падарунка.

Напрыканцы праграмы  ўсе ўдзельнікі паглядзелі мультфільм.

Святлана МАЛЫШКА