Жыхары в. Хатынічы: «Не зробіце дарогі – будзем скардзіцца…»

Жыхары вёскі Хатынічы просяць пачысціць і падсыпаць дарогі на вясковых вуліцах. Фота з архіва "ГЧ"

Гэта тэма ўзнікла стыхійна на вясковым сходзе працаўнікоў ААТ “Хатынічы”, які прайшоў у сельскім Доме культуры 3 сакавіка.

Калі прадстаўнікі раёнай улады звярнуліся да вяскоўцаў з пытаннем, што яшчэ іх турбуе, жыхары адрэагавалі вельмі бурна.

“Няхай раёнае кіраўніцтва сядзе ў свае машыны і праедзе па Падаўлінні. Больш нічога не хочу… Падзівіцеся на платы, колькі на іх бруду з лужын. Я ў мінулым годзе пафарбавала плот, а сённы на лаўку не сядзеш, бо машыны сунуцца пад самы плот, каб гразь і яміны аб’ехаць”, – сказала адна з жыхароў праблемных вуліц Галіна Якаўлеўна.

Другая жанчына падтрымала яе, сказаўшы: “Конь быў заграз, дык машынай яго выцягвалі. Не ведаю ўжо, кудою ехаць іншы раз”.

Генадзь Перашчук, старшыня Хатыніцкага сельвыканкама, адказаў аднавяскоўцам: “У Ганцавічах толькі 40% асфальтаваных дарог, у нас – 60%. Вы ж бачыце, што можам, тое робім. На ўсё грошай не стае”.

Вяскоўцы ж казалі, што ім не патрэбны асфальтаваныя дарогі, добра было б, каб яны былі без ямін.

“Чысціце своечасова, больш нічога не трэба. Бо калі не зробіце дарогі – будзем скардзіцца ў Брэст. Мо там на вас управу знойдуць”, — сказала адна з жыхарак вёскі.

Старшыня сельвыканкама паабяцаў вяскоўцам, што на тым тыдні дарогі пагрэйдзіруюць.

Старшыня Савета дэпутатаў Ганцавіцкага райвыканкама Віктар Дрозд  выканаў запрашэння хатынаўцаў праехацца па праблемных вуліцах. Ён разам з Генадзем Перашчуком і старастам Андрэем Ярашэвічам пабачылі на свае вочы, ці на самой справе вуліцы знаходзяцца ў такім сумным становішчы. Як высветлілася – сапраўды.

“Да мяне неаднаразова звярталіся вяскоўцы з гэтым пытаннем, і я казаў уладам пра яго. Сёння кіраўнікі нарэшце прыслухаліся да людзей. Віктар Якаўлевіч даў заданне старшыні сельвыканкама пачысціць дарогі і падсыпаць. На тым тыдні, можа, праблема ўжо вырашыцца”, — сказаў стараста вёскі.